Масква трохі падабрэла — і вось ужо дзядзька Сэм атрымлівае анучай па твары. Піша ў сваім блогу Аляксандар Класкоўскі.
Сёньня Лукашэнка даў інтэрвію "Рэйтэр". Мяркуючы па тых фрагмэнтах, што падалі беларускія крыніцы, сэнсацыяў не прагучала.
Хтосьці, напэўна, адразу падумаў, што гэта лорд Бэл сасватаў аўтарытэтную брытанскую агенцыю. Можа так, а мо' й не. Нагадаю: год таму, задоўга да таго, як лорд прапанаваў піяраўскія паслугі, беларускі афіцыйны кіраўнік ўжо даваў інтэрвію "Рэйтэр". Лукашэнка ўвогуле быў нарасхват: замежныя мэдыі сьпяшаліся зь першых вуснаў пачуць пра сварку з Расеяй і намер разгарнуць дыялёг з Захадам. Камэнтатары наперабой казалі пра новы трэнд.
Тады беларускі кіраўнік наўпрост заявіў пра "імпэрскія замашкі" Расеі і запэўніў, што эканамічны ўдар з усходу — рэзкае падвышэньне коштаў на энэрганосьбіты — Беларусь вытрымае. Сёньня Лукашэнка выказаўся падобным чынам, камэнтуючы стасункі з Вашынгтонам: ""Палохаць нас санкцыямі ня трэба, мы выжывем".
Як бачым, у выпадку замежнай палітыкі афіцыйнага Менску ўсе "трэнды" — гэта ня болей як ваганьні ківача. Масква прыціснула — пачынаюцца гульні з Захадам. Масква дала крэдыт і недарагі газ, зьявілася надзея атрымаць дывідэнды на "асымэтрычным адказе" заакіянскім імпэрыялістам — і вось ужо дзядзька Сэм атрымлівае анучай па твары.
Пытаньне ў тым, ці вялікі яшчэ рэсурс гэтай маятнікавай палітыкі. Мяркуючы па сёньняшнім інтэрвію, у тутэйшага кіраўніцтва застаецца, у прыватнасьці, надзея згуляць на прагматызьме Эўразьвязу ("Мы гатовы з вамі прайсьці па любым шляху дзеля таго, каб палепшыць нашы адносіны"), хаця і Брусэлю вялікіх абяцанак беларускі бок не дае. Паводле БЕЛТА, "гаворачы аб шляхах далейшага паляпшэньня дачыненьняў Беларусі з ЭЗ, Аляксандар Лукашэнка падкрэсьліў: "Гэта пытанне да Эўрапейскага зьвязу, а не да мяне…". Карацей, мяч дзяжурна перакідаецца на бок Эўропы.
Новы тур гульняў з Захадам можа актывізавацца пад канец году, калі прэзыдэнт Мядзьведзеў (ці дзьвюхгаловы "Пуцьведзеў") выявіць цьвёрдасьць у пераходзе на рынкавыя кошты энэрганосьбітаў для Беларусі. Тады мы і ўбачым чарговы трэнд. Трэнд ківача.
ЗЫ. Тым часам сталі вядомыя яшчэ некаторыя выказваньні Лукашэнкі ў інтэрвію для "Рэйтэр". Зь іх вынікае, што, магчыма, некалькіх апазыцыянэраў увосень прапусьцяць у Палату. Вось вам будзе і гульня ў адлігу. Ну а вось у чым няма ваганьняў, дык у гэтым: "Калі сытуацыя будзе такой, як зараз, і са мной асабіста, і ў краіне, то я, зразумела, буду балятавацца на чарговы тэрмін... Разьлічвайце на горшае" (апошняя рэмарка, трэба разумець, адрасаваная ўсяму гнілому Захаду ў асобе прадстаўнікоў "Рэйтэр":)
Каментары