Федэрацыя хакея Беларусі мае намер прывезці ў краіну чарговы чэмпіянат свету ў вышэйшым дывізіёне, заявіў яе кіраўнік Ігар Рачкоўскі на справаздачна-выбарнай канферэнцыі ФХБ 31 мая ў Мінску.
«Наша задача — вярнуць чэмпіянат свету ў Беларусь», — заявіў Рачкоўскі.
Паводле яго слоў, вялікай падмогай у гэтым плане стала абранне прадстаўніка Беларусі Сяргея Ганчарова ў склад савета Міжнароднай федэрацыі хакея (ІІХФ).
Выбары ў савет ІІХФ прайшлі ў Маскве ў сярэдзіне мая. Наяўны склад (прэзідэнт, тры віцэ-прэзідэнты і дзевяць членаў) абраны на чатыры гады.
Ганчароў, якому ў верасні споўніцца 33 гады, стаў самым маладым членам савета ІІХФ за ўсю яго гісторыю.
31 мая справаздачна-выбарная канферэнцыя зацвердзіла прызначэнне Ганчарова на пасаду намесніка старшыні Федэрацыі хакея Беларусі.
«Маё абранне ў савет ІІХФ — дэманстрацыя таго, што ў сусветным хакеі да Беларусі ставяцца з павагай, — адзначыў Ганчароў. — Балатавацца ў склад савета ІІХФ я планаваў праз чатыры гады, але Ігар Анатольевіч (Рачкоўскі) настаяў, каб рабіў гэта ўжо ў Маскве. У выніку ўсё склалася ўдала. Магчыма, гэта дзякуючы таму, што мы працавалі з іншымі федэрацыямі наўпрост і на працягу ўжо многіх гадоў выбудоўвалі з імі даверныя адносіны».
Што да заяўкі на правядзенне чэмпіянату свету, то, паводле слоў новаабранага намесніка старшыні ФХБ, Беларусь будзе прэтэндаваць на турнір 2021, 2022 ці 2023 года.
«Мы працуем па трох чэмпіянатах. Будзем дзейнічаць паводле сітуацыі. Найбольш рэальным на сённяшні дзень выглядае 2022 год. У 2021-м прэтэндуе Фінляндыя. Яе будзе цяжка абыйсці. Плюс 2022 год — гэта год Алімпіяды. У такія гады, як правіла, ІІХФ аддае чэмпіянаты свету краінам, якія не ўваходзяць у «вялікую шасцёрку» сусветнага хакея», — адзначыў Ганчароў у інтэрв'ю БелаПАН.
Бюджэт магчымага чэмпіянату свету ў Беларусі пакуль не вызначаны нават арыенціровачна. Зараз вядзецца праца над афіцыйнай заяўкай, якая будзе пададзеная ў ІІХФ.
«Калі казаць пра грошы, то лічу вельмі важным вось які момант. Калі на падрыхтоўку да ЧС-2014 Беларусь выдаткавала сур'ёзныя сродкі на будаўніцтва арэн (паводле неафіцыйнай інфармацыі, «Мінск-Арэна» каштавала 350 млн даляраў, «Чыжоўка-Арэна» — 150 млн) і інфраструктуру, то цяпер гэта ўсё ў нас ёсць. Гэта значыць атрыманне чэмпіянату свету зараз выглядае значна больш выгадным з пункта гледжання прыбытку. Ну і не варта забываць, што гэта вельмі сур'ёзны іміджавы аспект», — заўважыў Ганчароў.
Нагадаем, Ганчароў ужо працаваў у ФХБ у якасці генеральнага сакратара, калі арганізацыю ўзначальваў Уладзімір Навумаў. Былы кіраўнік МУС і федэрацыі неаднаразова падкрэсліваў, што Ганчароў адыграў вельмі важную ролю ў тым, што чэмпіянат свету 2014 года прайшоў у Беларусі.
Цяпер чытаюць
Лукашэнка параіў узбекам шукаць вялікія грошы ў Расіі2
Лукашэнка параіў узбекам шукаць вялікія грошы ў Расіі
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм1818
Каментары