Працягваюцца супрацьстаянні ў Башкірыі. Сілавікі ўжылі слезацечны газ, пратэстоўцы закідваюць іх снегам
Да будынка суда ў Баймаку, дзе некалькі тысяч чалавек пратэстуюць супраць прысуду актывісту Фаілю Алсынаву, прыбыло падмацаванне сілавікоў. Яны ўжылі слезацечны газ. Людзі не разыходзяцца і не даюць вывезці Алсынава.
Карэспандэнты з месца падзеяў паведамляюць, што сілавікі ўжылі светлашумавыя гранаты і слезацечны газ. У выніку ёсць пацярпелыя.
«Трое хлопцаў беглі, трымаліся за вочы, сказалі, што жорстка ціснуць», — перадае карэспандэнт выдання «НеМосквы».
Фаіля Алсынава, якога асудзілі сёння на чатыры гады калоніі, яшчэ не вывезлі з будынка суда. Паліцыя не змагла адціснуць людзей з дарогі, па якой павінен праязджаць аўтазак.
У натоўпе распаўсюджваюцца чуткі, што на месца сутыкненняў павінен прыехаць губернатар рэгіёну Радый Хабіраў, які і напісаў данос на актывіста, але губернатара няма.
Падставай для крымінальнага пераследу Алсынава стала яго прамова падчас узгодненага мітынгу вясной 2023 года. У ёй актывіст, у прыватнасці, ужыў словазлучэнне «кара халык»: «Армяне зʼедуць на сваю радзіму, «кара халык» — да сябе, рускія — у сваю Разань, татары — у свой Татарстан. Мы не зможам перасяліцца, у нас няма іншага дома, наш дом тут!»
Экспертыза, праведзеная падчас расследавання, вырашыла, што гэтае словазлучэнне «адпавядае значэнню слоў «хачы«, «чуркі«, «чарнамазыя». На падставе экспертызы Алсынава абвінавацілі ў экстрэмізме, нібыта ён даў «негатыўную ацэнку» жыхарам Цэнтральнай Азіі і Каўказа. Мясцовыя актывісты ж настойваюць, што пераклад прамовы, які быў прадстаўлены ў судзе, наўмысна сказілі.
Алсынаў — башкірскі нацыянальны лідар, экаактывіст, выступаў супраць золатаздабычы ў рэгіёне.
Памерла Святлана Курс. У яе творах спалучаліся магія жывога жыцця і бязлітасны псіхалагізм. А ў публічных выступах і ФБ — рэзкі антыімперыялізм і элегантны лірызм15
Каментары