У Гродзенскім раёне хлопец падпаліў уласны дом — маці прасіла яго з'ехаць, а ён не хацеў
Зараз ён можа з'ехаць ад мамы, але ў калонію.
Жыхар Гродзенскага раёна пражываў у адным доме з маці. У іх часта ўзнікалі канфлікты: жанчына лічыла, што 25-гадоваму сыну час з'ехаць і жыць сваім жыццём.
У хлопца былі іншыя планы, жыць самастойна ён не хацеў. Пасля чарговай сваркі хлопец пайшоў на радыкальныя меры — ён абліў бензінам падлогу ў доме і падпаліў дыван, паведамляе гродзенская міліцыя.
Агонь распаўсюдзіцца не паспеў, але пачалося моцнае задымленне. Хлопец спалохаўся, патэлефанаваў знаёмым і папрасіў выклікаць ратавальнікаў. Адначасова суседзі, убачыўшы дым, прыбеглі дапамагаць і патушылі агонь.
Ніхто з людзей не пацярпеў, але некаторая мэбля ў доме была пашкоджана агнём. На падпальшчыка завялі крымінальную справу па артыкуле «наўмысныя знішчэнне альбо пашкоджанне чужой маёмасці».
Хлопцу пагражае да дванаццаці гадоў калоніі.
Каментары