У ГЗЦ Palazzo замест H&M адкрыюць фэшн-хол з больш як 30 магазінамі беларускіх брэндаў. Гэтая модная прастора будзе называцца Balance Store.
У ГЗЦ Palazzo неўзабаве з'явіцца модная прастора. На плошчах, якія раней займаў магазін H&M, адкрыецца Balance Store — фэшн-хол, які аб'яднае больш за 30 магазінаў беларускіх брэндаў, піша Onliner.
Фэшн-хол зойме каля 1350 «квадратаў» на другім паверсе ТРЦ Palazzo. Планіроўка моднай прасторы будзе закальцаванай — каб ніводны брэнд не згубіўся і абавязкова паўстаў перад позіркам наведвальнікаў. У цэнтры запраектавана зона чакання ў выглядзе астраўка з мяккімі канапамі.
У Balance Store будзе шмат жаночага адзення, абутку, бялізны, купальнікаў і аксесуараў. Побач прадставяць мужчынскія брэнды. У кожнай краме прадугледжана індывідуальная прымерачная. Але будзе і адна вялікая зона прымеркі з арт-люстэркамі ў падлогу і месцамі для сэлфі. Тут з'явіцца функцыя выкліку кансультанта. Працаваць гэта будзе так: чалавек выбірае некалькі мадэляў з розных крам і ў прымерачнай па чарзе выклікае прадстаўнікоў брэндаў, каб удакладніць дэталі (пры неабходнасці). Яны ж потым забяруць адзенне назад.
Новую прастору плануюць адкрыць напрыканцы кастрычніка.
Па словах прадстаўнікоў Balance Store, каля паловы месцаў ужо забраніравана. У прыярытэце — беларускія брэнды, якія рухаюць модную індустрыю наперад.
H&M закрыла крамы ў Беларусі і Расіі ў 2022 годзе.
Каментары