На будынку віленскай друкарні Скарыны з'явіўся чарговы правакацыйны надпіс ФОТА
Надпіс «Вільня наша» з бела-чырвона-белым сцягам зроблены ў той жа дзень, што і надпіс на будынку ЕГУ.
Надпіс нанесены на сцяну дома па Шкляной вуліцы, 2 (Stiklių g. 2). Гэты будынак на рагу з Вялікай вуліцай выбраны зусім не выпадкова, бо, як лічыцца, у ім размяшчалася віленская друкарня Францыска Скарыны, пасля яго вяртанні з Прагі. Менавіта тут і была надрукаваная «Малая падарожная кніжыца» у 1522 годзе й «Апостал» у 1525-м.
Пра дзейнасць Францыска Скарыны сведчыць памятная дошка, усталяваная на будынку з боку Вялікай вуліцы.
Пазней у гэтым будынку знаходзілася друкарня братоў Мамонічаў, дзе друкавалася трэцяя рэдакцыі Статуту Вялікага княства Літоўскага.
Таксама насупраць надпісу вісіць шыльда ў гонар іншага беларуса — Казіміра Сваяка, каталіцкага святара і паэта.
Мяркуючы па даце «21.02», указанай у надпісе, ён зроблены ў той жа дзень, што і аналагічны надпіс на будынку ЕГУ.
Ёсць аргументаваныя падазрэнні, што гэтыя правакацыйныя надпісы робяцца спецыяльна для таго, каб выклікаць негатыўнае стаўленне да беларусаў, якія жывуць у Літве, з боку літоўскіх уладаў і грамадства. У свой час мы прасачылі нават, як іх замаўляюць.
Параўноўваючы надпісы, можна заўважыць, што яны, хутчэй за ўсё, робяцца адной рукой. Пры гэтым «ш» і «л» пішуцца так, як пішуць іх людзі, якія карыстаюцца лацініцай і не ведаюць кірыліцы.
«Наша Нiва» — бастыён беларушчыны
ПАДТРЫМАЦЬ
Каментары
Чакаем прыбірання "дошак Скарыны", рэстарацый "1863", шапікаў "Кропка" і ўсяго беларускага з Вільні, "каб не правакавалі пагрозы нацыянальнай бяспецы"?