Шатдаўн у ЗША: пакуль урад паралізаваны, Пентагону ахвяравалі 130 мільёнаў долараў на зарплаты вайскоўцам
У ЗША невядомы чалавек ахвяраваў Пентагону 130 мільёнаў долараў для выплаты заробкаў і сацыяльных льгот вайскоўцам падчас шатдаўну — перыяду, калі ўрад не працуе і не можа выплачваць сродкі з федэральнага бюджэту.
Пра гэта паведамляе РБК-Украіна са спасылкай на NBC News.
Як адзначыў галоўны прадстаўнік Пентагону Шон Парнел, ведамства прыняло ахвяраванне ў межах сваіх паўнамоцтваў на прыняцце падарункаў. Ён таксама ўдакладніў умову, на якую павінны быць выкарыстаныя гэтыя сродкі:
«Ахвяраванне зроблена з умовай, што яго выкарыстаюць для кампенсацыі выдаткаў на зарплаты і льготы вайскоўцам», — сказаў ён.
Прэзідэнт ЗША Дональд Трамп пацвердзіў, што невядомы ахвяраваў 130 мільёнаў долараў Пентагону. Паводле яго слоў, гэта зрабіў «патрыёт» і «мой сябар» — імя дабрадзея Трамп раскрываць адмовіўся. Прэзідэнт таксама дадаў, што невядомы дабрачынец нібыта заявіў пра гатоўнасць пакрываць любы дэфіцыт фінансавання федэральных устаноў, які ўзнік праз шатдаўн.
Урадавы шатдаўн у ЗША
З 1 кастрычніка 2025 года ў ЗША працягваецца прыпыненне працы ўрада (так званы шатдаўн), бо Кангрэс не зацвердзіў федэральны бюджэт. Гэта першы шатдаўн за апошнія сем гадоў і трэці за два тэрміны прэзідэнцтва Трампа.
Бягучы шатдаўн ужо стаў другім па працягласці за ўсю гісторыю краіны. Рэкордным лічыцца прыпыненне працы ўрада, якое доўжылася 35 дзён у 2018—2019 гадах, таксама падчас першага тэрміну Дональда Трампа.
Федэральныя агенцтвы ўжо сутыкнуліся з сур’ёзнымі праблемамі. У прыватнасці, Нацыянальнае ўпраўленне ядзернай бяспекі ЗША (NNSA) адправіла ў неаплатныя адпачынкі 1400 супрацоўнікаў.
Паводле ацэнак, агульныя страты ад шатдаўну ў ЗША складаюць да 15 мільярдаў долараў штодня.
Цяпер чытаюць
«Спасибо, Лена! Продолжайте вести наблюдение». Афіцэр, які пісаў Харысавай, пасвіўся ў чатах палітэміграцыі, а некаторым дзяўчатам нават прапаноўваў абмяняцца нюдсамі9191
Каментары