На паказе кіно ў Мінску гледачы пабіліся і сталі аблівацца газіроўкай — што здарылася?
Для гледачоў, якія прыйшлі 17 студзеня на беларускую прэм’еру фільма «Пакаёўка» ў кінатэатр Moon, што ў «Дана Мол», уражанні былі сапсаваныя бойкай у зале. Падчас сеанса некалькі сябровак і парачка сталі біцца, лаяцца і аблівацца спрайтам. Сведкі распавялі, чаму ўзнік канфлікт і чым скончыўся.
Па словах відавочцаў, усё пачалося з таго, што тры беларускі на працягу першай паловы фільма бесперапынна і гучна каментавалі змест стужкі. Акрамя таго, дзяўчыны выкрыквалі мацюкі. Гэта нікому не падабалася, але першым не вытрымаў малады чалавек, які сядзеў у радзе перад імі. На ветлівую і спакойную просьбу «паводзіць сябе цішэй» хлопец быў адпраўлены «на*уй».
Пасля гэтага дзяўчыны абмацюкалі суседа насупраць — той у адказ не стрымліваўся ў выразах таксама. Неўзабаве дайшло да бойкі, якую распачала прадстаўніца трыа.
На відэа, якое апублікавала ў сваім «Трэдс» адна з карыстальніц, чутно, як спачатку дзяўчаты працягваюць пасылаць хлопца і яго дзяўчыну на тры літары, перакрыкваючы гукавую дарожку фільма. На другім роліку адна з іх гахае маладога чалавека па галаве, на што ў адказ ужо яго каханая вылівае на кампанію бутэльку вадкасці — па словах сведак, гэта быў спрайт, які ў тым ліку заліў гледачоў, што сядзелі побач.
У канцы бойкі хлопец спрабуе адпіхваць крыўдзіцелек рукамі, а яго другая палова дапамагае яму, адбіваючыся пустой бутэлькай. Кожны з бакоў крычаў, каб другі бок пакінуў залю. Па выніку сышоў хлопец і яго партнёрка.
«Канфлікт скончыўся тым, што група дзяўчат забівала хлопцу стрэлку пад «Дана Мол». Пара пакінула залу, але пры гэтым дзяўчаты пайшлі за імі, спрабуючы працягнуць канфлікт. Але фільм 10/10 — усім рэкамендую!» — напісала карыстальніца «Трэдс».
Яшчэ адна са сведак адзначыла, што кампанія гучных дзяўчат, на яе погляд, выглядала выпіўшай, таму такая агрэсіўныя паводзіны з іх боку і сталі магчымыя.
Некаторыя беларусы пры гэтым задаліся справядлівым пытаннем: а чаму адміністрацыя і ахова не патушылі канфлікт? Па словах гледачоў таго сеанса, да адміністрацыі адразу звярнуліся, але тыя вырашылі не ўмешвацца. Адна з прадстаўніц кінатэатра прыйшла ў залу толькі тады, калі пара, спрабаваўшая ўціхамірыць гучнае трыа, ужо сыходзіла.
Частка каментатараў дадаткова абурылася паводзінамі іншых людзей у зале: «То бок, хлопец быў адзіны, хто не цярпіла? Чаму іншыя не падтрымалі яго, не дапамаглі? Толькі сядзелі побач і хіхікалі». Аўтарка відэа выказала здагадку, што большасць не сцяміла праз шокавы стан.
Актыўныя карыстальнікі цяпер просяць беларускую міліцыю прыцягнуць парушальнікаў спакою да адказнасці.
Цяпер чытаюць
Стаў вядомы дакладны адрас, па якім жыве Анжаліка Мельнікава ў Мінску44
Каментары