Таўнхаусы за $435 000 ад дзяржзабудоўшчыка амаль размялі за пару дзён
У канцы сакавіка дзяржзабудоўшчык «Мінскбуд» запусціў продажы таўнхаусаў. Яны з'яўляюцца часткай пасёлка «Утульны-2», які будуецца каля жылога комплексу пад назвай «Утульны». Увесь квартал фарміруецца ў лясным масіве недалёка ад Нацыянальнай бібліятэкі. Адзін таўнхаус ацэнены ў больш як $400 000. Прайшло пару тыдняў, і свабоднымі засталіся толькі 4 варыянты з 12, піша «Анлайнер».
Кожны таўнхаус паводле задумы ўяўляе сабой двухузроўневы дом плошчай 206,38 кв. м з тэрасай і асабістым участкам. На першым паверсе спраектаваны пярэдні пакой, аб'яднаныя кухня і гасціная-сталовая, санвузел і міні-кацельня. На другім паверсе размясцілі тры спальні з гардэробнымі і санвузламі. Прадугледжаны таксама лоджыі, а над паверхам — халоднае гарышча. Узводзіць першы рад таўнхаусаў пачалі ў лютым 2026 года. А здаць абяцаюць у снежні 2026 года.
Жыллё здаецца з чарнавой аддзелкай. Кошт «квадрата» для ўсіх ахвотных — 6100 рублёў.
Калі аплаціць усю суму адразу, то гэта 1 258 918 рублёў — каля $435 000. Калі скарыстацца крэдытаваннем, то кошт вырасце да 1 311 338 рублёў — прыкладна $453 000. Ёсць яшчэ растэрміноўка.
Стала вядома, што свабоднымі засталося толькі 4 таўнхаусы з 12. Пра гэта паведамілі ў тэлеграм-канале «Мінскбуд». Прычым у інтэрнэце ёсць інфармацыя, што большую частку купілі яшчэ ў першыя дні продажаў.
— Не ўпусціце магчымасць: цана пакуль ранейшая! — удакладняе прадстаўнік забудоўшчыка.
Мяркуючы па рэндэрах, у продаж паступіў толькі першы рад таўнхаусаў. А іх у перспектыве плануецца пабудаваць значна больш. Журналісты патэлефанавалі ў аддзел продажаў — удакладніць, што засталося і ці плануецца падаражанне:
— У наяўнасці засталіся кватэры №2, 3, 4, 5.
— Астатнія, атрымліваецца, ужо куплены?
— Так, забраніраваны. Людзі чакаюць нашага разгляду. У нас дзейнічае сістэма разгляду дольшчыка. Гэта працэдура доўжыцца месяц. Праз месяц мы агучым сваё рашэнне аб згодзе заключыць дамову. Можа быць адмоўлена без тлумачэння прычын.
— Ці плануецца падаражанне?
— На іншыя таўнхаусы, якія мы будзем прапаноўваць, будзе фарміравацца іншы кошт. Гэта закрытая інфармацыя, але яны дакладна будуць даражэйшыя. Агучым цэны, калі выйдзе дэкларацыя.
А ў цэлым забудова ў межах Парніковай, Падлеснай і Анаева чакаецца глабальная. Акрамя 60 таўнхаусаў, на тэрыторыі з'явіцца каля 100 сучасных катэджаў, а таксама гандлёва-адміністрацыйны будынак, паркоўкі, дзіцячыя пляцоўкі, спортзоны, пляцоўкі для заняткаў міні-футболам, валейболам і тэнісам. І гэта не лічачы двух шматпавярховікаў, адзін з якіх ужо здадзены, а другі расце не па днях, а па гадзінах.
Цяпер чытаюць
Другі вайсковец, які загінуў пры аварыі МАЗа пад Асіповічамі — 21‑гадовы тэнісіст з Віцебска2
Каментары