У Мінску жанчыну затрымалі на даху і завялі крымінальную справу
Відавочцы патэлефанавалі ў міліцыю і сказалі, што на даху шматпавярховіка стаіць жанчына ў неадэкватным стане. На месца хутка прыбыў патруль, піша агенцтва «Мінск-Навіны».
Супрацоўнікі міліцыі пабачылі на даху 48‑гадовую жанчыну, якая не рэагавала на пытанні. Каб прадухіліць магчымую небяспеку для яе жыцця, яе схапілі за рукі. У гэты момант жанчына выпусціла сумку, з якой выпаў шпрыц з забароненым рэчывам.
Спачатку жанчыну даставілі на медыцынскае абследаванне, а пасля таго распачалі супраць яе крымінальную справу.
На судзе яна прызнала віну і расказала, што каля двух гадоў ужывала псіхатропнае рэчыва альфа-PVP, якое набывала праз нелегальныя інтэрнэт-крамы. Апошнюю дозу яна спачатку не змагла знайсці па каардынатах, але пазней вярнулася і адшукала схованку. Дома прыгатавала раствор і ўвяла яго, а пасля вырашыла выкарыстаць рэшткі, падняўшыся на дах.
Паведамляецца, што жанчына не працуе, мае малалетняе дзіця і раней ужо была судзімая.
Суд прызнаў яе вінаватай у незаконным набыцці і захоўванні псіхатропных рэчываў без мэты збыту і прызначыў пакаранне ў выглядзе абмежавання волі на два гады без накіравання ў папраўчую ўстанову. Таксама ёй прызначана прымусовае лячэнне ад нарказалежнасці.
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі2121
Каментары