У Беларусі запрацаваў медпартал. Зараз звесткі сваёй медыцынскай карты можна праглядаць анлайн
У Беларусі запусцілі новы сэрвіс — «Медпартал», які дазваляе атрымліваць інфармацыю пра стан свайго здароўя ў рэжыме анлайн. Звесткі пра наведванні дактароў, пастаўленыя дыягназы, вынікі аналізаў, вакцынацыю і іншыя медыцынскія паслугі даступныя праз асабісты кабінет карыстальніка, піша Onliner.by.
Новы сэрвіс так і называецца — «Медпартал». Ён распрацаваны Міністэрствам аховы здароўя і пакуль працуе ў тэставым рэжыме.
Сістэма працягвае папаўняцца новымі данымі і функцыямі, таму некаторыя раздзелы могуць працаваць нестабільна, а частка інфармацыі — адлюстроўвацца не цалкам.
Акрамя электроннай медыцынскай карты, на партале прадугледжаны дзённік здароўя, дзе карыстальнікі могуць самастойна фіксаваць асноўныя паказчыкі свайго стану — тэмпературу цела, артэрыяльны ціск, пульс і ўзровень сатурацыі. Гэтыя звесткі ў далейшым могуць дапамагчы доктару падчас вочнага прыёму і прызначэння лячэння.
Пры гэтым даныя, унесеныя ў дзённік здароўя, не праглядаюцца дактарамі ў рэжыме рэальнага часу. Таму ў экстранных сітуацыях або пры пагаршэнні самаадчування неабходна неадкладна звяртацца па медыцынскую дапамогу: выклікаць хуткую дапамогу па нумары 103 або выклікаць доктара дадому.
Для абароны персанальных даных доступ да партала ажыццяўляецца толькі праз бяспечныя спосабы аўтарызацыі. Увайсці ў сістэму можна з дапамогай электроннага лічбавага подпісу, ID-карткі грамадзяніна са счытвальнікам або праз Міжбанкаўскую сістэму ідэнтыфікацыі (МСІ).
Каментары
Вам не нужна свобода. Теперь вся информация о вашем здоровье будет доступна ГБ, чтобы вас ломать, доводя до грани.