Вашынгтон пакідае ўсе санкцыі ў дачыненні Беларусі.
ЗША пакінуць у сіле санкцыі ў дачыненні да Беларусі, заявіў 21 снежня на брыфінгу ў Вашынгтоне памочнік дзяржсакратара ЗША Філіп Кроўлі.
«Нашы санкцыі застануцца ў сіле, і тое, што адбылося ў Беларусі, — трагічна», — заявіў Кроўлі. Адказваючы на пытанне наконт «заляцанняў» Лукашэнкі з Захадам, ён адзначыў, што Беларусь можна назваць краінай, якая «ніколі не выпускала магчымасць упусціць магчымасць».
Кроўлі падкрэсліў, што павага да дэмакратычнага працэсу і правоў чалавека знаходзіцца ў цэнтры адносін Захаду з Беларуссю.
20 снежня ЗША не прызналі вынікі прэзідэнцкіх выбараў у Беларусі.
«Злучаныя Штаты рашуча асуджаюць дзеянні ўрада Беларусі па падрыве дэмакратычнага працэсу, а таксама непрапарцыянальнае выкарыстанне сілы супраць палітычных актывістаў, прадстаўнікоў грамадзянскай супольнасці і журналістаў», — гаворыцца ў заяве Белага дома.
ЗША патрабуюць неадкладнага вызвалення «ўсіх кандыдатаў у прэзідэнты і соцень пратэстуючых», затрыманых 19 і 20 снежня.
Цяпер чытаюць
Беларус зрабіў прапанову каханай каля знакамітага фантана Трэві ў Рыме — пад апладысменты дзясяткаў турыстаў1
Каментары