Мяркуе міністр транспарту Літвы.
Да перамен у Беларусі не варта імкнуцца такімі спосабамі, якія могуць нанесці ўрон эканомікам краін Еўрасаюза. Такое меркаванне выказаў 13 красавіка ў інтэрв’ю газеце Lietuvos rytas міністр транспарту і камунікацый Літвы, лідар Руху лібералаў Элігіюс Масюліс.
Як адзначае партал delfi.lt, сваю пазіцыю Масюліс выклаў пасля нядаўняга апублікавання агенцтвам Рэгнум інтэрв’ю беларускага пасла ў Літве Уладзіміра Дражына, які падкрэсліваў: падтрымліваючы санкцыі ЕС у дачыненні да Беларусі, Літва рызыкуе панесці мільярдныя страты
Трэба адзначыць, што МЗС Літвы назвала выказванні Дражына «тэндэнцыйнымі і некарэктнымі».
Кіраўнік літоўскага Мінтранса, у сваю чаргу, мяркуе, што «не трэба блытаць добрыя эканамічныя адносіны з палітычным бачаннем».
«На мой погляд, Літва павінна не пасіўна назіраць за тым, што ствараецца ў кабінетах Бруселя, а актыўна растлумачыць сітуацыю. Мне здаецца, што ЕС павярхоўна глядзіць на гэтую праблему»,— заявіў Масюліс.
Паводле яго слоў,
страта патоку беларускіх грузаў нанясе Літве вялікі ўрон.«Мы выйгралі ў канкурэнтнай барацьбе з Латвіяй за гэтыя грузы, таму ўгнаенні і сельскагаспадарчую тэхніку беларусы вязуць цераз Клайпеду. Гэта прыносіць нашай дзяржаве немалы даход. Напрыклад, з 36,6 мільёна тон грузаў у Клайпедскім порце летась прыкладна 5 мільёнаў тон складалі беларускія ўгнаенні. Кампенсаваць страты іншымі грузамі за кароткі час немагчыма. Калі мы пазбавімся замоў Мінска, беларускія грузы будуць перавозіцца цераз Расію, па Чорным моры», — заўважыў міністр.
***
- Нагадаем, 23 сакавіка Савет міністраў замежных спраў ЕС прыняў рашэнне прымяніць санкцыі ў дачыненні да 29 кампаній, якія належаць тром звязаным з рэ<>жымам Лукашэнкі бізнесменам, а таксама дадаткова ўключыць у спіс неўязных 12 асоб.
- У той жа дзень кіраўнік МЗС Літвы Аўдронюс Ажубаліс заявіў: ЕС не ўстанаўлівае нейкіх шырокамаштабных санкцый адносна Беларусі, якія маглі б паўплываць на асобныя галіны гаспадаркі. «Меры носяць мэтанакіраваны характар. Не можа быць ніякай размовы пра поўнае адмежаванне або пра татальныя санкцыі», — падкрэсліў ён.
- Каментуючы негатыўнае стаўленне да санкцый ЕС у дачыненні да Беларусі з боку прадстаўнікоў літоўскага бізнесу, Ажубаліс растлумачыў: «На літоўскі бізнес найперш уплывае тое, як Лукашэнка кіруе дзяржавай і эканомікай, а не тое, як складваюцца адносіны паміж ЕС і Беларуссю. Рызыка для бізнесу перш за ўсё зыходзіць з эканамічнага тупіка, у які Беларусь вядзе яе кіраўнік, рэпрэсіўныя меры, якія ён прымяняе ў дачыненні да свайго грамадства, а таксама неадэкватныя меры, якія ён можа прымяніць да замежнага бізнесу. Вось дзе сапраўдныя пагрозы».
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі2121
Каментары