Lekcyi pra satanizm u papskim universytecie

Chutkaje pavieličeńnie sataninskich sektaŭ u śviecie, raspaŭsiudžvańnie infarmacyi, što prapahanduje ich, prymusiła Vatykan raspačać padrychtoŭku ekzarcystaŭ.

Letaś u Italii čalcy rok-hurtu «Źviary djabła» zabili 19-hadovuju liderku hurtu dy 16-hadovaha chłopca. Niabožčyki byli pryniesieny ŭ achviaru kniaziu ciemry padčas sataninskaha abradu, jaki vyznačajecca hvałtam, seksam i narkotykami. Pavodle niepaćvierdžanych danych, kala miljona maładych italjancaŭ mieli niejkija stasunki z satanizmam — na Apeninach dziejničaje pad tysiaču sataniskich sektaŭ. Pošaść imkliva raspaŭsiudžvajecca pa Eŭropie.

Tamu Vatykan vyrašyŭ abviaścić vajnu satanie i jaho prychilnikam. Heta adzin z apošnich napramkaŭ dziejnaści kaściołu, što vyznačyŭ niabožčyk papa Jan Pavał II. U lutym raspačalisia dvuchmiesiačnyja kursy (košt — 188 eŭra), što vučać ksiandzoŭ, jak zmahacca z kultam satany. Sučasnymi ekzarcystami stali teolahi, psycholahi j antrapolahi. Navučańnie adbyvałasia ŭ papskim universytecie «Redžyna Apastalorum». Akramia ekzarcyzmu, navučency razhladali psychalohiju satanizmu, srodki i ŭmovy jaho pašyreńnia, pracy ajcoŭ kaściołu pra satanu. Ksiandzy na hetkich «kursach pavyšeńnia kvalifikacyi» navučylisia dapamahać achviaram satanizmu — čalcam sektaŭ dy ich baćkam.

U 1999 h . metadalohija ekzarcyzmu, niaźmiennaja z 1614 h., była pierahledžana. Ciapier napačatku ekzarcyst adpraŭlaje ŭstupnuju malitvu ci čytaje vybranyja psałmy, Novy Zapaviet, pramaŭlaje Symbal Viery. Potym prychodzić čarha zahadu złomu duchu adpuścić apantanuju asobu. Pavodziny apantanaha mohuć nahadvać scenu ź filmu žachaŭ. Ekzarcyst, pramaŭlajučy hałoŭnyja słovy «Z kryža Panskaha», kładzie kaniec epitrachili na šyju apantanaj asoby, a pravuju ruku — na jaje hałavu.

«Pačynajecca ŭsio ź cikavaści da muzyki hevi-metał, potym nadychodzić čarha Internetu (satanizm raspaŭsiudžvajecca praz adpaviednyja sajty), i hetki šlach z časam davodzić da mohiłak», — tłumačyć vykładčyk universytetu «Redžyna Apastalorum» Karła Klimaci. Na jaho dumku, kult satany pieraškadžaje relihii j kultury, bo satanizm viadzie da inšych hrachoŭ — parnahrafii, sada-mazachizmu i inšych seksualnych vyčvarenstvaŭ, jakija dapuskajucca padčas rytuałaŭ u honar kniazia ciemry.

Na Biełarusi ciapier pracujuć tolki dva katalickija ekzarcysty — u Horadni j Rosi. Jość niekalki pravasłaŭnych śviataroŭ, što taksama vyhaniajuć złych duchaŭ. Vidać, pakul naša hramadztva nie zvažaje na pašyreńnie dziaciej ciemry siarod moładzi, i zmahajucca ź imi ŭ nas zbolšaha tolki milicyjanty dy psycholahi.

Padrychtavaŭ Rusłan Raviaka

• 0
• 0
• 0
• 0
• 0
• 0
• 0
• 0