Biełaruskija naftapierapracoŭščyki na miažy stratnaści

Čysty prybytak Mazyrskaha NPZ skaraciŭsia ŭ paraŭnańni ź minułym hodam u 30 razoŭ. Sytuacyja praciahvaje paharšacca, adznačajuć profilnyja čynoŭniki.

Naftapierapracoŭčyja pradpryjemsty, jakija jašče letaś byli asnoŭnaj krynicaj pastupleńnia valuty ŭ biudžet, pieražyvajuć ciažkija časy. Prybytki skaracilisia ŭ dziasiatki razoŭ. Tak pa vynikach pieršaha paŭhodździa čysty prybytak na Mazyrskim NPZ i Navapołackim «Naftanie» skłaŭ $3,8 i $26 młn. Dla paraŭnańnia — u minułym hodzie mazyrčuki zarabili $120 młn. Pradpryjemstvy vymušanyja brać darahija kredyty na zakupku syraviny. Pra techničnaje pieraŭzbrajeńnie havorka j nie viadziecca. Na NPZ nie vyklučajuć mahčymaści vymušanaha prodažu pradpryjemstvaŭ pry zachavańni siońniašniaj sytuacyi, paviedamlaje hazeta «Biełorusy i rynok».

Zavody pracujuć na poŭnuju mahutnaść, ale rentabelnaść vytvorčaści pry hetym zastajecca skrajnie nizkaj. Pryčyna chavajecca ŭ padvyšeńni ekspartnych mytaŭ na naftu (ciapier składaje 223,9 $/t) i vyvaznych mytaŭ na naftapradukty (163,2 i 87,9 $/t śvietłych i ciomnych naftapraduktaŭ adpaviedna). Padvysiłasia taksama j staŭka rasiejskaha specyjalnaha myta na pastaŭku nafty — z 58,6 da 65,6$/t. Pa słovach biełaruskich čynoŭnikaŭ, dziaržsubsydyi ŭ pamiery 90% ad specyjalnaha myta na naftu, jakuju atrymlivajuć usie pierapracoŭščyki nafty ŭ Biełarusi, užo niedastatkova dla kampensacyi strataŭ. Rasiejskija naftavyja davalnickija kampanii «Łukojł», «Słavnaftachim» dy «Słaŭnafta» admaŭlajucca pracavać u takich umovach.

Adnak, adznačaje hazeta «BR», urad nie pradprymaje radykalnych zachadaŭ pa vypraŭleńni sytuacyi. Zamiest hetaha adbyvajecca manapalizacyja ŭnutranaha rynku: prava na pastaŭku natapraduktaŭ na ŭnutry krainy atrymali šerah dziaržpradpryjemstvaŭ, niebiełaruskija kampanija z hetaj sfery faktyčna vyciaśniajucca.

Biełaruś čakajuć siurpryzy z pastaŭkami nafty i ŭ nastupnym hodzie. Havorka viadziecca pra vykanańnie ŭ nastupnym hodzie h.zv. naftavaha balansu. Sioleta jon składaje 21,5 młn. t. Adnak praz toje, što rasiejskija partnery paličyli nierentabelnym pastaŭki nafty pa čyhuncy, a takim čynam u Biełaruś musiła atrymać kala 4 młn. t., vykanańnie zadačy robicca prablematyčnym. Heta moža pryvieści da skaračeńnia abjomu pastavak nafty. Adzin z prapanavanych sposabaŭ vyjścia ź niaprostaj sytuacyi duža nie padabajecca Biełaruskaj čyhuncy — skaračeńnie taryfaŭ na transparciroŭku.

• 0
• 0
• 0
• 0
• 0
• 0
• 0
• 0