U spravie terakta ŭ Bostanie troch studentaŭ abvinavačvajuć u tym ža, u čym u Biełarusi — Kavalova
Pahražaje im ad piaci da vaśmi hadoŭ turmy.
Dvum studentam z Kazachstana, zatrymanym u ZŠA pa spravie ab terakcie ŭ Bostanie, vystaŭleny abvinavačańni ŭ tym, što jany sprabavali schavać dačynieńnie da jaho ichnaha siabra Džachara Carnajeva.Za heta im moža pahražać da piaci hadoŭ turmy i štraf 250 tysiač dołaraŭ, paviedamiła prakuratura štata Masačusets. Pakul ža sud pastanaviŭ pakinuć ich pad vartaj da nastupnaha słuchańnia - 14 maja, pieradajuć infarmacyjnyja ahienctvy.
Pavodle źviestak FBR, Azamat Tažajakaŭ i Dyjas Kadyrbajeŭ, a taksama hramadzianin ZŠA Robieł Filipas sprabavali źniščyć dokazy ŭ pakoi Džachara.«Usie troje pryznaŭšysia ŭ tym, što ŭviečary 18 krasavika jany vynieśli z pakoja Carnajeva zaplečnik z vypatrašanymi fiejervierkami i noŭtbuk, a Tažajakaŭ i Kadyrbajeŭ taksama pryznaŭšysia ŭ tym, što vyrašyli pazbavicca ad jaho, daviedaŭšysia z navin, što Džachar padazrajecca ŭ tym, što jon źjaŭlajecca adnym z saŭdzielnikaŭ vybuchaŭ padčas marafonu», — havorycca ŭ abvinavaŭčym dakumiencie, apublikavanym u internecie.
Zaplečnik i noŭtbuk chłopcy vykinuli na zvałku, tam ich paźniej znajšli pradstaŭniki śpiecsłužbaŭ ZŠA.Filipasu vystavili abvinavačvańni ŭ dačy łžyvych pakazańniaŭ śledčym. Jamu pahražaje da vaśmi hadoŭ turmy i štraf čverć miljona dalaraŭ.
Miarkujecca, što chłopcy dziejničali z falšyva zrazumietaha pačućcia tavarystva.
Kadyrbajeŭ i Tažajakaŭ zdymali na dvuch kvateru ŭ Ńju-Biedfardzie (Masačusets), a Filipas žyŭ u Kiembrydžy. Jany i Džachar Carnajeŭ adnačasova pastupili ŭ 2011 hodzie ŭ Masačusetski ŭniviersitet.
Uvosień 2012-ha — viasnoj 2013-ha Džachar žyŭ z susiedam u pakoi 7341 univiersiteckaha internata. FBR praviała tam pieratrus i kanfiskavała mietaličnyja šaryki, šmat piratechničnych pryładaŭ, a taksama čornuju kurtku i biełuju biejsbołku, padobnyja da tych, u jakich Carnajeva-małodšaha zafiksavali videakamiery pierad teraktam.
FBR śćviardžaje ŭ abvinavačvańni, što Kadyrbajeŭ, Tažajakaŭ i Filipas pabyvali ŭ internacie i źnieśli šerah pradmietaŭ, jakija naležali Džacharu. Usie jany pryznalisia na dopycie, što zabrali z saboj zaplečnik Carnajeva i vyrašyli «pazbavicca ad jaho paśla taho, jak zrazumieli, što Carnajeŭ byŭ adnym z bostanskich bambistaŭ».
U Kadyrbajeva pieršaha źjaviłasia dumka, što asoba, fotarobat jakoj raspaŭsiudzili telekanały, heta jahony kaleha Džachar. Jon napisaŭ Džacharu pra svaju zdahadku. «Uchochočiešsia!» — havaryłasia ŭ esesmescy Džachara ŭ adkaz. Carnajeŭ taksama napisaŭ: «Lepš nie pišy mnie bolš» i «Kali tabie niešta treba ŭ maim pakoi, možaš uziać», — cytuje Rasiejskaja słužba Bi-Bi-Si.
18 krasavika Kadyrbajeŭ z Tažajakovym i Filipasam pryjechali da Džachara ŭ internat. Susied Carnajeva upuściŭ ich i paviedamiŭ, što toj źjechaŭ hadziny za dźvie da taho. Siabry pahladzieli ŭ pakoi kino, a potym zaŭvažyli tam čorny zaplečnik ź fiejervierkami, ź jakich byŭ vysypany porach. Taksama ŭ pakoi byŭ ciubik vazielinu, jaki moh być vykarystany pry vyrabie bomby.
Śledčy, spasyłajučysia na słovy Kadyrbajeva, piša, što ŭ hety momant toj zrazumieŭ, što Džachar prykłaŭ ruku da bostanskich vybuchaŭ. Tažajakaŭ taksama pakazaŭ, što siabar padzialiŭsia ź im svaimi padazreńniami.
Pa słovach śledčaha, Kadyrbajeŭ pryniaŭ rašeńnie vynieści zaplečnik ź internata z tym, «kab admazać siabra Carnajeva ad niepryjemnaściaŭ».Kadyrbajeŭ prychapiŭ jašče i noŭtbuk. Usio heta jon vykinuŭ u śmiećcievy kantejnier kala svajho doma. Tažajakaŭ i Filipas nie dapamahali jamu ŭ hetym, ale viedali, što jon toje zrabiŭ.
26 krasavika śledstva znajšło zaplečnik Džachara ŭ śmiećci na zvałcy ŭ Ńju-Bedfardzie. Unutry čornaha pakieta lažali vypatrašanyja fiejervierki, słoičak vazielinu i chatniaje zadańnie z Masačusietskaha ŭniviersiteta.
Kadyrbajeŭ i Tažajakaŭ i raniej pryciahvali ŭvahu palicyi, u pryvatnaści, tym, što haniali pa Bostanie na mašynie, na jakoj zamiest numaroŭ byŭ nadpis Terrorista#1.Na aŭtamabili z takimi numarnymi znakami haniaŭ i Džachar Carnajeŭ. U Amierycy za hrošy možna nabyvać sabie numar nie tolki ź ličbami, ale i ź lubym nadpisam.
U Biełarusi ŭ anałahičnaj situacyi apynuŭsia elektryk Uład Kavaloŭ, siabar Dźmitryja Kanavałava. Śledstva śćviardžała, što jon z pačućcia falšyva zrazumietaha siabroŭstva dapamoh Kanavałavu dastavić vybuchoŭku i nie paviedamiŭ pra terakt.Sam jon dakazvaŭ, što nie viedaŭ pra namier Kanavałava ździejśnić vybuch i ŭvohule nie vieryŭ u vinavataść siabra. Kavalova pakarali śmierciu. Prysud byŭ vykanany ŭ 2012 hodzie.
U vypadku, kali vina Tažajakava, Kadyrbajeva i Filipasa budzie dakazanaja, im budzie pahražać turma i hihancki štraf.
Ciapier čytajuć
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary