XIV Dzień biełaruskaha piśmienstva projdzie 2 vieraśnia ŭ Škłovie. U im čakajecca ŭdzieł 5 tys. haściej, u tym liku vysokich słužbovych asob krainy.
Jak paviedamiła 28 žniŭnia na pres‑kanfierencyi ŭ Minsku pieršy namieśnik ministra infarmacyi Lilija Ananič, u śviacie voźmuć udzieł vyšejšyja słužbovyja asoby Biełarusi, dypłamaty, vučonyja, dziejačy kultury i mastactva, artysty, žurnalisty i piśmieńniki. Siarod ich — artysty Maryinskaha teatra z Sankt‑Pieciarburha, biełaruskija estradnyja vykanaŭcy, a taksama piśmieńniki z Bałharyi, Rasii, Sierbii i Ukrainy. Z udziełam zamiežnych litarataraŭ 31 žniŭnia ŭ staličnym Domie presy projdzie pasiadžeńnie kruhłaha stała na temu «Słavianskaja litaratura i vykliki sučasnaści».
Uračystaje adkryćcio Dnia biełaruskaj piśmiennaści pačniecca 2 vieraśnia apoŭdni na hałoŭnaj scenie la škłoŭskaj ratušy. Tam ža projdzie cyrymonija ŭznaharodžańnia pieramožcaŭ respublikanskaha konkursu na lepšy tvor mastackaj litaratury 2006 hoda «Załaty kupidon» i nacyjanalnaha konkursu «Mastactva knihi» «Załaty falijant». U ramkach fiestyvalu knihi i presy, što projdzie ŭ hety ž dzień la škłoŭskaha rajonnaha Doma kultury, budzie pradstaŭlena retraśpiektyŭnaja vystava vydańniaŭ Janki Kupały i Jakuba Kołasa, pryśviečanaja 125‑hodździu z dnia naradžeńnia kłasikaŭ biełaruskaj litaratury. Ekspazicyja, padrychtavanaja Nacyjanalnaj knižnaj pałataj Biełarusi, uklučaje 310 knih — usie tvory narodnych paetaŭ Biełarusi, vydadzienyja ŭ krainie z 1925 pa 2007 hady.
U prahramu śviata taksama ŭklučana cyrymonija adkryćcia novaj ekspazicyi Škłoŭskaha rajonnaha krajaznaŭčaha muzieja ŭ budynku na vulicy Savieckaj i pomnika rasijskamu vajennamu dziejaču, hienierał‑lejtenantu Siamionu Zoryču. Z 1778 pa 1799 hady jon vałodaŭ miastečkam Škłoŭ, dzie zasnavaŭ dvaranskaje vučylišča, teatr i manufaktury.
Jak zaznačyła Ł.Ananič, vydaviectva «Biełaruś» prymierkavała da śviata vypusk fotaalboma «Škłoŭ», a vydaviectva «Mastackaja litaratura» — knih «Moj Mahiloŭ» (u sieryi «Tvaje harady, Biełaruś») i «Adsiul vytok, adsiul natchnieńnie. Škłoŭščyna litaraturnaja» (u sieryi «Biełaruś litaraturnaja»).
Pavodle słoŭ namieśnika ministra infarmacyi, u 2008 hodzie Dzień biełaruskaha piśmienstva płanujecca pravieści 7 vieraśnia ŭ Barysavie (Minskaja vobłaść).
Kamientary