U mienskaj kniharni «Łohvinaŭ» prezentavali knihu ese žurnalista Radyjo Svaboda Siarhieja Dubaŭca.
Kniha nazyvajecca «Errata: jak što nazyvajecca, tak i adbyvajecca». U joj aŭtar razvažaje pra toje, jak padmieny nazvaŭ i sensaŭ upłyvajuć na śviadomaść i rečaisnaść biełarusaŭ, analizuje absurdnyja pavoroty losu krainy, jakija, na jaho dumku, pačynajucca mienavita na verbalnym uzroŭni. Kniha nadrukavanaja ŭ vydaviectvie Ihara Łohvinava i vyjšła ŭ seryi «Biełaruski kalehijum».
Kaardynatar seryi, filozaf Aleś Ancipienka adzančyŭ, što dla taho, kab zaŭvažyć składanyja pracesy ŭ hramadztvie, patrebny litaratar, jaki bačyć praces zboku. Mienavita takim litarataram jość Siarhiej Dubaviec.
«Siarhiej — vydatny stylist, tamu ŭ mianie jak u redaktara jaho knihi pracy było niašmat, ale ja zrazumieŭ, što Siarhiej piša pra važnyja rečy, kanceptualna vybudoŭvaje ich u adzinaje cełaje. A paśla robić cikavyja vysnovy».
Aleś Ancipienka adznačyŭ, što, niahledziačy na toje, što «Errata», jak i inšyja knihi seryi, vyjšła davoli tonkaj, heta nie pamianšaje jaje značnaści:
«Admysłova byŭ abrany taki farmat, kab aŭtary vybrali tolki samaje važnaje i cikavaje. Taki žorski adbor tvoraŭ. Čytać toŭstyja knihi zaraz ni ŭ kaho niama času, chiba što tolki kali siadziš za kratami», — pažartavaŭ Aleś Ancipienka.
«Errata» pierakładajecca z łacinskaj movy jak «pamyłka druku». Tak nazyvali j arkušy-ŭkładyšy, na jakich raniej paznačali prapuščanyja i paźniej zaŭvažanyja pamyłki i ŭkładali ŭ vydańnie, kali kniha drukavałasia vysokim drukam.
Siarhiej Dubaviec padkreśliŭ, što asnoŭnaja ideja «Errata» — toje, jak adbyvajecca, tak i pavinna nazyvacca. Praź niapravilnaje nazyvańnie rečaŭ i pracesaŭ biełarusy apynulisia ŭ pierakulenym dahary nahami śviecie. Pra hety śviet — jaho kniha.
Pavinšavać Siarhieja Dubaŭca z vychadam knihi pryjšli filozaf Valancin Akudovič, litaratary Alhierd Bacharevič, Hanna Kiślicyna, Lavon Barščeŭski, kulturolah Siarhiej Chareŭski.
Ciapier čytajuć
22‑hadovy Viktar z-pad Klecka pratrymaŭsia na froncie miesiac. A paśla baćki pierasvarylisia, dzielačy hrabavyja15
Kamientary