Łohvinaŭ prosić Mininfarm admianić zahad ab pazbaŭleńni jaho licenzii

Uładalnik pryvatnaha minskaha vydaviectva «Łohvinaŭ» indyvidualny pradprymalnik Ihar Łohvinaŭ prosić Ministerstva infarmacyi Biełarusi admianić zahad ab pazbaŭleńni jaho licenzii na vydavieckuju dziejnaść «dziela paźbiahańnia razhladu zhadanaj sprečki ŭ sudovym paradku».

Jak paviedamiŭ BiełaPAN Ihar Łohvinaŭ, adpaviedny list jon nakiravaŭ ministru infarmacyi Alehu Pralaskoŭskamu 7 kastryčnika.U liście vydaviec adznačaje, što 23 vieraśnia atrymaŭ paviedamleńnie za podpisam namieśnika ministra infarmacyi Lilii Ananič ab spynieńni licenzii na prava ažyćciaŭleńnia vydavieckaj dziejnaści «ŭ suviazi z dapuščanymi hrubymi parušeńniami zakanadaŭstva ab licenzavańni, licenzijnych patrabavańniaŭ i ŭmoŭ». Ź lista Ananič vynikała, što parušeńni hetyja vyjavilisia ŭ vypusku vydaviectvam «Łohvinaŭ» drukavanaha vydańnia «Pres-fota Biełarusi — 2011», pryznanaha sudom ekstremisckim. U paviedamleńni ŭtrymlivałasia spasyłka na adpaviednaje rašeńnie kalehii Mininfarma ad 20 vieraśnia i zahad ad toj ža daty biez ukazańnia asoby, jakaja padpisała jaho. 

«Zahad ab spynieńni dziejańnia licenzii mnie nie pradastaŭleny, ukazańni na peŭnyja punkty pravavych aktaŭ, jakija pasłužyli padstavaj dla pryniaćcia takoha rašeńnia, jak i paradak jaho abskardžańnia, nie pryvodziacca», — piša vydaviec ministru. 

Kažučy pra pazbaŭleńnie jaho licenzii na vydavieckuju dziejnaść, Ihar Łohvinaŭ spasyłajecca na zaćvierdžanaje ŭkazam prezidenta pałažeńnie «Ab licenzavańni asobnych vidaŭ dziejnaści», a kankretna — na častku, dzie pieraličany parušeńni, za jakimi idzie spynieńnie dziejańnia licenzii. 

Pradprymalnik śćviardžaje, što takich parušeńniaŭ jon nie ŭčyniaŭ. U svaju čarhu Ministerstva infarmacyi, ličyć jon, parušyła hetaje pałažeńnie tym, što adrazu adklikała licenziju, a nie vyniesła pastanovu ab ŭstaranieńni parušeńniaŭ. Takim čynam, dla pryniaćcia radykalnaha rašeńnia «adsutničajuć zakonnyja padstavy», pierakanany Łohvinaŭ. 

«Ukazanaje rašeńnie, jak i atrymanaje mnoj paviedamleńnie, liču hrubym parušeńniem zakanadaŭstva Respubliki Biełaruś i maich pravoŭ, u tym liku źviazanych z ažyćciaŭleńniem pradprymalnickaj dziejnaści», — padkreślivaje Łohvinaŭ pradprymalnik. 

Pradprymalnik prosić Mininfarm ukazać, chto padpisaŭ zahad ab pazbaŭleńni licenzii, a taksama vysłać jamu kopiju hetaha dakumienta dla dalejšaha abskardžańnia. Akramia hetaha, vydaviec prosić Pralaskoŭskaha pryciahnuć da adkaznaści asob, «vinavatych u padrychtoŭcy ŭkazanych dakumientaŭ». 

«Ja nie viedaju, čym skončycca heta sprava. Adnak jość peŭnyja pracedury, jakija pavinny vykonvacca, u tym liku ŭ dačynieńni da mianie. Spadziajusia, što ŭsio ŭładzicca da suda», — skazaŭ Ihar Łohvinaŭ. 

Pra toje, što pryvatnaje vydaviectva «Łohvinaŭ» pazbaŭlajuć licenzii za vypusk alboma «Pres-fota Biełarusi — 2011», stała viadoma ŭ kancy minułaha tydnia. Pra heta paviedamiŭ namieśnik staršyni Biełaruskaj asacyjacyi žurnalistaŭ Andrej Bastuniec, vystupajučy na V Forumie hramadzianskaj supolnaści Uschodniaha partniorstva, jakich prachodziŭ 4—6 kastryčnika ŭ Kišyniovie. 

Fotaalbom byŭ pryznany ekstremisckim na padstavie rašeńnia suda Ašmianskaha rajona ŭ krasaviku hetaha hoda.

Ekśpiertnaja kamisija na čale z načalnikam upraŭleńnia ideałahičnaj raboty Hrodzienskaha abłvykankama Paŭłam Skrabko pryznała, što ŭ albomie «ŭtrymlivajucca naŭmysna skažonyja vydumki, jakija nie adpaviadajuć rečaisnaści, ab žyćciadziejnaści Respubliki Biełaruś u palityčnaj, ekanamičnaj, sacyjalnaj i inšych śfierach, što źnievažajuć nacyjanalny honar i hodnaść hramadzian Respubliki Biełaruś». 

Juryst Bastuniec źviarnuŭ uvahu na toje, što pry razhladzie spravy ab pryznańni ekstremisckim alboma «Pres-fota Biełarusi — 2011» vydaviectva nie pryciahvałasia da pracesu. 

6 kastryčnika vosiem žurnalisckich arhanizacyj z krain SND i Hruzii, a taksama Mižnarodnaja fiederacyja žurnalistaŭ zaklikali Mininfarm Biełarusi viarnuć vydaviectvu «Łohvinaŭ» licenziju. 

Niezaležnaje vydaviectva «Łohvinaŭ» isnuje z 2000 hoda.

Zajmajecca vydańniem sučasnaj biełaruskaj litaratury, navukovaj litaratury pa humanitarnych dyscyplinach, pierakładami na ruskuju i biełaruskuju movy.

• 0
• 0
• 0
• 0
• 0
• 0
• 0
• 0