MUS paviedamiła padrabiaznaści spravy pra bardeli u Minsku
Supracoŭniki hałoŭnaha ŭpraŭleńnia pa baraćbie z arhanizavanaj złačynnaściu i karupcyjaj MUS «spynili dziejnaść kryminalnaj hrupoŭki, členy jakoj na praciahu niekalkich hadoŭ zajmalisia ŭtrymańniem bardelaŭ dla zaniatku prastytucyjaj», paviedamiła ŭpraŭleńnie infarmacyi i hramadskich suviaziaŭ ministerstva.
Pra rasśledavańnie kryminalnaj spravy pa hetym fakcie Śledčy kamitet paviedamiŭ 15 kastryčnika. Pavodle infarmacyi MUS, minčanka 1975 hoda naradžeńnia pry dapamozie troch saŭdzielnikaŭ (usie biespracoŭnyja) padšukvała dziaŭčat lohkich pavodzin i zabiaśpiečvała ich «pracaj».
Z 2007 hoda na terytoryi Minska ŭtrymlivałasia sietka arandavanych kvater (u siarednim piać-siem kvater). U ich vykarystoŭvaŭsia zaniatak prastytucyjaj 13 hramadzianak Biełarusi (žycharak Minska i Bresckaj vobłaści) i dźviuch hramadzianak Ukrainy.
U niezakonnym biźniesie rola kožnaha ŭdzielnika była stroha vyznačana: raźmiaščeńnie i redahavańnie ankiet prastytutak na roznych sajtach znajomstvaŭ, pryjom zvankoŭ ad klijentaŭ, pieranakiravańnie ich na «pustyja» kvatery, zbor hrošaj i h.d.
Kiraŭnik hrupy naŭmysna stvaryła takuju sistemu, jakaja dazvalała «pryviazać» prastytutak da siabie, a zatym pastavić ich u daŭhavuju zaležnaść.
Tak, pad vyhladam akazańnia dapamohi jana vyrašała roznyja sacyjalna-bytavyja pytańni i arhanizoŭvała nieabchodnaje miedycynskaje supravadžeńnie.
Bolš za toje, dla dziaciej niekatorych ź ich stanaviłasia chrosnaj maci.
Prablemy, što ŭźnikali, vyrašalisia z pryciahnieńniem štatnych advakataŭ.
Śledčym kamitetam raspačata sprava na padstavie č. 2 art. 171 Kryminalnaha kodeksa (vykarystańnie zaniatku prastytucyjaj ci stvareńnie ŭmoŭ dla zaniatku prastytucyjaj, učynienyja arhanizavanaj hrupaj).
Sankcyja artykuła praduhledžvaje pakarańnie ŭ vyhladzie pazbaŭleńnia voli terminam da 10 hadoŭ z kanfiskacyjaj majomaści.
Dziadok raskazaŭ, jak pavodziŭ by siabie ŭ siońniašniaj Biełarusi i što budzie dalej5
Kamientary