Uniesieny ŭ «čorny śpis» Eŭraźviazu načalnik Babrujskaj papraŭčaj kalonii № 2 Alaksandar Kakunin svajo žyćcio pryśviaciŭ penitencyjarnaj systemie. Heta ŭ jaho siamiejnaje.
Toje, što ŭ śpis biełaruskich hramadzianaŭ, suprać jakich dziejničajuć vizavyja i majomasnyja sankcyi Eŭraźviazu, uniesienyja načalnik Babrujskaj papraŭčaj kalonii № 2 Alaksandar Kakunin i jahony namieśnik Jury Trutko, stała niečakanym i dla pravaabaroncaŭ, i dla turemščykaŭ.
Mienavita ŭ hetaj kalonii adbyvaje pakarańnie źniavoleny pravaabaronca, kiraŭnik «Viasny» Aleś Bialacki. Bialacki ciarpić ad roznych spahnańniaŭ u kalonii, jaho pazbaŭlajuć spatkańniaŭ z rodnymi i pieradač. Kalehi Alesia ź «Viasny» razumiejuć, što, vierahodniej za ŭsio, Kakunina i Trutko pakarali za kiepskaje staŭleńnie da Alesia Bialackaha. Adnak u «Viaśnie» kažuć, što eŭrapiejcy ź imi na hety kont nia railisia. Viasnoŭcy ŭvohule starajucca być aściarožnymi, kab svaimi zajavami nie naškodzić Bialackamu, jaki zastajecca ŭ kalonii faktyčna zakładnikam. Ciapier ža svajaki i kalehi Alesia Bialackaha pabojvajucca, što ŭ kalonii pravaabaroncu buduć pomścić za rašeńnie Eŭraźviazu.
Ci tak heta budzie, u samoha načalnika kalonii Alaksandra Kakunina spytać nie ŭdałosia. Jon, vysłuchaŭšy praz sakratarku pytańnie ad Svabody, adkazvać admoviŭsia:
«Kamentaroŭ jon davać nia budzie, ale kali jość pytańni — źviartajciesia ŭ presavuju słužbu Departamentu vykanańnia pakarańniaŭ MUS», — pierakazała słovy načalnika jahonaja sakratarka. Pierad hetym, pačuŭšy navinu, jana navat ździviłasia: «Vo papali!»
Načalnik Babrujskaj papraŭčaj kalonii № 2 Alaksandar Kakunin jašče małady, jon naradziŭsia 12 traŭnia 1975 hodu niepadalok ad viadomaj na ŭsiu Biełaruś turmy strohaha režymu, što na stancyi Navasady Barysaŭskaha rajonu Mienskaj vobłaści. U hetaj turmie 40 hadoŭ pracavaŭ jahony baćka. Tam ža ŭ 1998 hodzie pačaŭ pracoŭny šlach i Kakunin-małodšy. Prajšoŭ usie karjernyja etapy — ad načalnika atradu da načalnika kalonii. U Babrujskaj papraŭčaj kalonii № 2 Kakunin pracuje z 2010 hodu. Maje zvańnie padpałkoŭnika.
Jahonaja žonka Natalla Viktaraŭna taksama pracuje ŭ systemie vykanańnia pakarańniaŭ. Jahonaja 13-hadovaja dačka ŭžo zadumvajecca ab pastupleńni ŭ Akademiju MUS, jakuju skončyŭ jaje baćka.
«Nianaviści da asudžanych u mianie niama», — zajaviŭ sioleta spadar Kakunin u interviju hazecie Viačerni Babrujsk:
«Adzin z maich nastaŭnikaŭ, za plačyma jakoha była praca ŭ papraŭčych ustanovach rasiejskaj Poŭnačy, kazaŭ pryblizna tak: čałaviek asudžany, moža, navat za hvałtavańnie niepaŭnaletnich, za zabojstva. Ale jon — čałaviek, i da jaho treba stavicca pa-čałaviečy. Choć, nie schavaju, na padśviadomym uzroŭni nehatyŭ jość, moža, heta vyjaŭlajecca ŭ rezkaści addavańnia zahadaŭ, patrabavańniach. Ale ja čaściej dumaju pra inšaje: čamu hetych ludziej adkinuła hramadztva, čamu jany ŭ im nie znajšli svajho miesca, u čym pryčyna? Asabliva nad hetym dumaješ, kali da ciabie pastupajuć dakumenty na ŭmoŭna-daterminovaje vyzvaleńnie i ad ciabie zaležyć, ci zastaniecca asudžany ŭ kalonii, ci pojdzie na volu. Kim jon tam stanie?»
Składana ciapier hadać, jak adčuje Aleś Bialacki reakcyju načalnika kalonii i jahonaha namieśnika na rašeńnie Rady Eŭraźviazu. Adno možna skazać z peŭnaściu — rašeńnie ab daterminovym vyzvaleńni Bialackaha budzie prymać nia jon, a pradstaŭniki inšaj, bolš vysokapastaŭlenaj dynastyi.
Ciapier čytajuć
Hety biełarus daśleduje rak — voś što jon kaža pra SPF ad miełanomy, navukovy prahres i samy składany ŭ lačeńni rak3
Kamientary