Mer Słavianska raspaviała, što chitravała ź sieparatystami
Mer Słavianska Niela Štepa zajaviła, što jaje nibyta padtrymka sieparatystaŭ, jakija zachapili horad, była taktyčnym chodam dla vyzvaleńnia zakładnikaŭ.
Pra heta jana skazała žurnalistam siońnia dniom paśla narady meraŭ i kiraŭnikoŭ rajonnych administracyj Danieckaj vobłaści.
«Ja dziejničała va ŭmovach, kali ŭ mianie było 278 zakładnikaŭ (u zachoplenych sieparatystami budynkach) i ŭsio, što było zroblena — heta było zroblena, kab hetych zakładnikaŭ adpuścili, — skazała jana.
Štepa paviedamiła, što paśla taho, jak apošni zakładnik pakinuŭ budynak, «ja raźviarnułasia i pajšła, i vy mianie bolš nie bačyli».
«Ja ŭsio svaje dziejańni kaardynavała z Kijevam, z Danieckam», — skazała jana, padkreśliŭšy, što ŭvieś čas padtrymlivała suviaź z staršynioj Danieckaj abłdziaržadministracyi Siarhiejem Tarutam.
Taksama jana zajaviła, što bajeviki, jakija pryjechali ŭ Słaviansk, razdali nasielnictvu zbroju.
Pavodle jaje słoŭ, «uzbrojenyja ludzi, jakija pryjechali ŭ Słaviansk, pryvieźli kala tysiačy aŭtamataŭ, kala sotni hranatamiotaŭ «Mucha», jakija prabivajuć braniu tanka».
Taksama Štepa adznačyła, što hetyja «zialonyja čałaviečki» «kanfiskavali ŭ našaj milicyi 400 pistaletaŭ i 20 aŭtamataŭ, i ŭsio heta razdali našym žycharam, kab siońnia całkam pałochać horad».
«Ja pazaŭčora idu dadomu, a nasustrač mnie idzie žančyna ź pistaletam. Ja jaje pytaju, adkul jana jaho ŭziała, a jana adkazvaje mnie: dali na barykadach», — uzhadała mer.
Pry hetym dadała: «Jany (bajeviki) čakajuć siońnia, što pačnucca antyterarystyčnyja dziejańni i jany zaprosiać vojski Rasii. Ale ja adrazu chaču kazať: u horadzie Słaviansku nichto nie choča pierachodzić u Rasiju».
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie14
Kamientary