U Rasii asudzili biełarusa za dvajnoje zabojstva ziemlakoŭ.
31-hadovy ŭradženiec Mahiloŭskaj vobłaści adpravicca za kraty na 21 hod. Jaho pryznali vinavatym u dvajnym zabojstvie, razboi, kradziažy aŭto, naŭmysnym paškodžańni čužoj majomaści, uciokach z-pad varty.
Admietna, što raniej jon byŭ sudzimy na radzimie. Pa infarmacyi Śledčaha kamiteta Rasii,
jamu dali 15 hadoŭ za zabojstva z chulihanskich pamknieńniaŭ. Ale ŭ kastryčniku 2011 vyzvalili ŭmoŭna-daterminova — za dobryja pavodziny.
Letam 2012 jon daviedaŭsia, što ŭ pryjaciela jość vialikija hrošy — 20 tysiač dalaraŭ. Kab ich skraści, prydumaŭ ceły płan. A ŭ pamahatyja ŭziaŭ takoha ž byłoha zeka.
Prapanavaŭ bahatamu ziemlaku ŭznačalić bryhadu budaŭnikoŭ dla pracy ŭ Maskvie. Toj pahadziŭsia. Navat prapanavaŭ jechać na svaim «Miersedesie», prychapiŭ z saboj i hrošy. Vyjechali ŭtroch z Mahilova ŭnačy na 10 vieraśnia 2012. A praz 330 kiłamietraŭ, kala vioski Čornaje Viaziemskaha rajona, paprasili spynicca — pa patrebie. Vybrali, kali na darozie nie było inšych mašyn. A kali viarnulisia z kustoŭ, nakinuli kiroŭcu na šyju remień. Jon, praŭda, vyzvaliŭsia i kinuŭsia ŭciakać.
Dahnali i zadušyli ŭžo ŭ kiuviecie. Skrali 20400 dalaraŭ i 20 tysiač rasijskich rubloŭ. Kab ziemlaka nie paznali pa adbitkach palcaŭ, adsiekli jamu ruki. A cieła kinuli ŭ lesie.
Zatym raźviarnulisia i pajechali nazad u Biełaruś. Ale pa darozie zavadatar vyrašyŭ nie dzialicca z pamahatym.
Kali spynilisia kala mohiłak u Rasłaŭlskim rajonie, kab spalić svajo adzieńnie, zarezaŭ znajomca.
Dadomu vyrašyŭ viartacca na čužym aŭto. Ale ŭ Darahabužskim rajonie vylacieŭ u kiuviet. Mašyna zachrasła — i biełarus jaje padpaliŭ.
Zatrymali jaho ŭ Rasii praz paŭtara tydnia. Praŭda, užo ź izalatara jon pasprabavaŭ źbiehčy — złavili ŭ toj ža dzień. Ciapier daviadziecca siadzieć za kratami. U Biełarusi, miž inšym, za dvajnoje zabojstva praduhłdiedžana pakarańnie ažno da rasstrełu. U Rasii na śmiarotnaje pakarańnie nakładzieny maratoryj.
Ciapier čytajuć
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie12
Kamientary