BATE prajšoŭ ałbancaŭ, ale hulnia pakinuła šmat pytańniaŭ VIDEA
Barysaŭski kłub zmoh pieraadoleć 2-i kvalifikacyjny raŭnd Lihi čempijonaŭ. U ałbanskaj Korčy biełaraski kłub zhulaŭ u ničyju sa «Skienderbieu» – 1:1. Pieršaja sustreča skončyłasia ź likam 0:0. Hoł zabity ŭ haściach dazvoliŭ BATE prajści ŭ nastupny raŭnd.
Chacia pieršy tajm zusim nie pradviaščaŭ takoj niervovaj kancoŭki. Na 29-aj chvilinie barysaŭcy zmahli narešcie razmačyć bramnika «Skienderbieu». Maksim Vaładźko dahnaŭ miač na fłanzie, naviesiŭ u štrafnuju, dzie vydatna hałavoj zhulaŭ nie samy vysoki rasijski lehijanier Anry Chahuš. Takim čynam, hoł zrabili abaroncy.
Paśla hetaha terytaryjalnaj inicyjatyvaj całkam zavałodali ałbancy. Chacia Jahor Filipienka amal zaŭsiody razradžaŭ situacyju na poli. BATE šmat hrubiŭ, charvacki arbitr nie škadavaŭ papiaredžańniaŭ. Jašče pašancavała, što nichto nie atrymaŭ čyrvonaj kartki.
Jašče ŭ pieršym tajmie stała zaŭvažna, što nie zusim upeŭniena adčuvaŭ siabie ŭ bramie Siarhiej Černik. Adnojčy jon nie zmoh zafiksavać miač, jaki ad jaho ruk adskočyŭ u štanhu.
Dzivakavataści Černika i stali vyrašalnymi ŭ druhim tajmie. Na 67-aj chvilinie Radaš advažyŭsia na daloki ŭdar sa štrafnoha, miač lacieŭ na centru varot, ale naš bramnik ź im nie spraviŭsia – 1:1.
Druhaja pałova tajma prajšła pad niaspynnyja ataki ałbancaŭ. Kali b «Skienderbieu» zabiŭ, to nichto b nie zmoh nazvać heta niespraviadlivaściu. Apafieozam staŭ udar u svaje varoty Alaksandra Karnickaha. Na ščaście, miač trapiŭ u štanhu, a adskok Černik užo padściaroh.
Byli momanty i ŭ BATE. Ale Illa Aleksijevič nie zmoh pierajhrać varatara supiernika. A Vital Radzivonaŭ u zabojnaj pazicyi nie addaŭ vyvierany pas na Alaksandra Paŭłava.
Barysaŭcy iduć dalej, ale zastajucca pytańni, što kamandzie śviecić z takoj hulnioj? Praz tydzień u Vuhorščynie padčas matča z «Debrecenam» lahčej dakładna nie budzie.
Ciapier čytajuć
«70% mastakoŭ u čornych śpisach». Mastak Siarhiej Hrynievič paśla tryumfu ŭ Vieniecyi raskazaŭ pra hady maŭčańnia i pra toje, na jakim śviecie jon apynuŭsia1515
Kamientary