Śledčy kamitet: śmierć Ihara Pcičkina ŭ minskim SIZA źviazana z užyvańniem im spajsaŭ i ałkaholu

Jak paviedamili ŭ Śledčym kamitecie, Ihar Pcičkin ciaham praciahłaha času (nie mienš za hod) pakutavaŭ na sindrom zaležnaści ad psichaaktyŭnych rečyvaŭ (tak zvanych «spajsaŭ») i ałkaholu.

«Z momantu pačatku adbyćcia pakarańnia ŭ I. Pcičkina ŭźnikła vostraje (časovaje) psichičnaje rasstrojstva na fonie stanu admieny psichaaktyŭnych rečyvaŭ, jakoje ŭskładniłasia parušeńniem śviadomaści, varjackimi idejami pieraśledu, halucynacyjami. Z hetaj pryčyny, 3 žniŭnia 2013 I. Pcičkin byŭ špitalizavany z ahulnaj kamiery ŭ miedčastku izalatara, dzie z metaj praduchileńnia členaškodnictva byŭ zafiksavany miakkimi ramianiami da łožka», — adznačyli ŭ SK.

Ranicaj 4 žniŭnia chłopiec pamior ad vostraj sardečna-sasudzistaj niedastatkovaści, jakaja ŭźnikła na fonie raźvićcia sindromu.

Rodnyja Pcičkina paśla jaho śmierci zajaŭlali, što Ihara bili, što i stała pryčynaj śmierci. Śledčyja nie paćvierdzili hetuju viersiju: u miežach pravierki byli dapytany 190 čałaviek (rodnyja i znajomyja pamierłaha, supracoŭniki izalatara, sakamierniki); pravodzilisia śledčyja ekśpierymienty, ekśpiertyzy. Pravodziłasia ekshumacyja.

«Rasśledavańnie kryminalnaj spravy ŭ dačynieńni da miedycynskaha piersanału śledčaha izalatara ab nienaležnym vykanańni prafiesijnych abaviazkaŭ, što paciahnuła pa nieaściarožnaści śmierć asudžanaha I. Pcičkina, spyniena. Asnoŭnym u nastupleńni śmierci źjavilisia charaktar i ciažkaść samich chvaravitych pracesaŭ. Akazańnie miedycynskaj dapamohi ŭ poŭnym abjomie navat va ŭmovach śpiecyjalizavanaha stacyjanara nie harantavała spryjalnaha zychodu, u suviazi z čym dapuščanyja parušeńni słužbovych instrukcyj z boku miedycynskaha izalatara SIZA №1 nie znachodziacca ŭ pramoj pryčynnaj suviazi z nastupstvami»,

— zajavili ŭ Śledčym kamitecie.

U SK taksama adznačyli, što padčas rasśledavańnia pryčyn śmierci Ihara Pcičkina była zaviedziena kryminalnaja sprava suprać chłopca.

Vyjaviłasia, što jon nie tolki ŭžyvaŭ spajsy, ale i raspaŭsiudžvaŭ ich. Ciapier sprava spyniena praź śmierć jaje fihuranta.

21-hadovy Ihar Pcičkin pamior u SIZA na Vaładarskaha 4 žniŭnia 2013. Chłopiec musiŭ adbyć trochmiesiačny aryšt: sieŭ za rul aŭto, chacia byŭ pazbaŭleny pravoŭ.

Na sustrečy z načalnikam SIZA rodnym chłopca paviedamili, što ŭ Ihara 3 žniŭnia pačałosia «psichamatornaje ŭzbudžeńnie». I jaho źmiaścili ŭ miedycynskuju čaść, «dzie daviałosia fiksavać jaho miakkimi ramianiami». Na fotazdymkach trupa Pcičkina zaŭvažnyja šmatlikija siniaki. Foty vykładzienyja ŭ ahulny dostup u internet.

U śmierci chłopca vinavacili fielčara minskaha SIZA № 1, jaki dziažuryŭ u noč śmierci. Była raspačata kryminalnaja sprava za nienaležnaje vykanańnie prafiesijnych abaviazkaŭ miedrabotnikam, što paciahnuła za saboj pa nieaściarožnaści śmierć pacyjenta.

• 0
• 0
• 0
• 0
• 0
• 0
• 0
• 0