Следчы камітэт: смерць Ігара Пцічкіна ў мінскім СІЗА звязана з ужываннем ім спайсаў і алкаголю
Спынена расследаванне крымінальнай справы супраць фельчара ізалятара.
Як паведамілі ў Следчым камітэце, Ігар Пцічкін цягам працяглага часу (не менш за год) пакутаваў на сіндром залежнасці ад псіхаактыўных рэчываў (так званых «спайсаў») і алкаголю.
«З моманту пачатку адбыцця пакарання ў І. Пцічкіна ўзнікла вострае (часовае) псіхічнае расстройства на фоне стану адмены псіхаактыўных рэчываў, якое ўскладнілася парушэннем свядомасці, вар'яцкімі ідэямі пераследу, галюцынацыямі. З гэтай прычыны, 3 жніўня 2013 І. Пцічкін быў шпіталізаваны з агульнай камеры ў медчастку ізалятара, дзе з мэтай прадухілення членашкодніцтва быў зафіксаваны мяккімі рамянямі да ложка», — адзначылі ў СК.
Раніцай 4 жніўня хлопец памёр ад вострай сардэчна-сасудзістай недастатковасці, якая ўзнікла на фоне развіцця сіндрому.
Родныя Пцічкіна пасля яго смерці заяўлялі, што Ігара білі, што і стала прычынай смерці. Следчыя не пацвердзілі гэтую версію: у межах праверкі былі дапытаны 190 чалавек (родныя і знаёмыя памерлага, супрацоўнікі ізалятара, сакамернікі); праводзіліся следчыя эксперыменты, экспертызы. Праводзілася эксгумацыя.
«Расследаванне крымінальнай справы ў дачыненні да медыцынскага персаналу следчага ізалятара аб неналежным выкананні прафесійных абавязкаў, што пацягнула па неасцярожнасці смерць асуджанага І. Пцічкіна, спынена. Асноўным у наступленні смерці з'явіліся характар і цяжкасць саміх хваравітых працэсаў. Аказанне медыцынскай дапамогі ў поўным аб'ёме нават ва ўмовах спецыялізаванага стацыянара не гарантавала спрыяльнага зыходу, у сувязі з чым дапушчаныя парушэнні службовых інструкцый з боку медыцынскага ізалятара СІЗА №1 не знаходзяцца ў прамой прычыннай сувязі з наступствамі»,
— заявілі ў Следчым камітэце.
У СК таксама адзначылі, што падчас расследавання прычын смерці Ігара Пцічкіна была заведзена крымінальная справа супраць хлопца.
Выявілася, што ён не толькі ўжываў спайсы, але і распаўсюджваў іх. Цяпер справа спынена праз смерць яе фігуранта.
21-гадовы Ігар Пцічкін памёр у СІЗА на Валадарскага 4 жніўня 2013. Хлопец мусіў адбыць трохмесячны арышт: сеў за руль аўто, хаця быў пазбаўлены правоў.
На сустрэчы з начальнікам СІЗА родным хлопца паведамілі, што ў Ігара 3 жніўня пачалося «псіхаматорнае ўзбуджэнне». І яго змясцілі ў медыцынскую часць, «дзе давялося фіксаваць яго мяккімі рамянямі». На фотаздымках трупа Пцічкіна заўважныя шматлікія сінякі. Фоты выкладзеныя ў агульны доступ у інтэрнэт.
У смерці хлопца вінавацілі фельчара мінскага СІЗА № 1, які дзяжурыў у ноч смерці. Была распачата крымінальная справа за неналежнае выкананне прафесійных абавязкаў медработнікам, што пацягнула за сабой па неасцярожнасці смерць пацыента.
Прапаганда прычапілася да «дарагога» гадзінніка Латушкі. Той расказаў, што гэта за мадэль насамрэч36
Каментары