U Vilni adkryłasia kanfierencyja «Biełaruski EHU: paśla 10 hadoŭ u Litvie». Asnoŭnaja jaje meta — abjadnańnie studentaŭ, vypusknikoŭ, vykładčykaŭ i administracyi EHU dla adkrytaha abmierkavańnia dalejšaha losu ŭniviersiteta.
Arhanizataram mierapryjemstva źjaŭlajecca Studenckaje pradstaŭnictva EHU ŭ supracoŭnictvie z Asacyjacyjaj vypusknikoŭ i pry padtrymcy German Marshall Fund of the U.S.
Na kanfierencyju taksama zaprošany pradstaŭniki biełaruskaj hramadzianskaj supolnaści pieravažna z akademičnaj i adukacyjnaj śfier.
Zapłanavanaje vystupleńnie kandydataŭ na pasadu rektara: Daryusa Udrysa, Alaksandra Milinkieviča, Šarunasa Lijekisa i Taćciany Ščytcovaj.
Nahadajem, 30 vieraśnia pasadu rektara pakinuŭ akademik Anatol Michajłaŭ, jaki zasnavaŭ EHU i kiravaŭ im z momantu jaho stvareńnia. Konkurs na pasadu rektara arhanizavany Kiraŭnickim savietam VNU, jaki zasnavaŭ kamitet pa vybarach. Da 1 sakavika 2015 hoda pavinna być pryniataje kančatkovaje rašeńnie.
Prezident studenckaha pradstaŭnictva EHU Dzianis Kučynski zaznačyŭ, što pieršyja ŭ historyi EHU vybary rektara –– ciažki pierachodny pieryjad. «Heta padzieja i jaje nastupstvy, –– skazaŭ prezident studenckaha pradstaŭnictva EHU, –– mohuć stać losavyznačalnymi dla ŭniviersiteta jak adukacyjnaha prajekta ź biełaruskaj nakiravanaściu, što ŭžo šyroka abmiarkoŭvajecca jak unutry ŭniviersiteta, hetak i ŭ miedyjnaj prastory».
Studenckaja supolnaść, zaznačyŭ Kučynski, prava hołasu pry vybary rektara nie maje, ale pačutaj być choča, i kanfierencyja moža stać šancam dla hetaha. Dla studentaŭ, zaznačyŭ Kučynski, važna, kab EHU zachavaŭ biełaruski viektar raźvićcia, dla čaho «nieabchodna vybrać rektaram pradstaŭnika Biełarusi».
«Rektaram moža być tolki čałaviek, u jakoha jość razumieńnie kantekstu. U studenckim asiarodździ jość apasieńni ŭ dačynieńni da stratehii raźvićcia EHU. Moža, jon stanie rehijanalnaj VNU, moža, amierykanskim kaledžam. My b chacieli, kab va ŭniviersitecie vykarystoŭvalisia pry zachavańni bałansu napracoŭki jak amierykanskaj, hetak i jeŭrapiejskaj sistem adukacyi z aporaj na biełaruskaje hramadstva», –– skazaŭ Kučynski.
Jeŭrapiejski humanitarny ŭniviersitet byŭ adkryty ŭ Minsku ŭ 1992 hodzie. U 2004 hodzie biełaruskija ŭłady, niezadavolenyja samastojnaściu jaho kiraŭnictva, zakryli VNU. U 2005 hodzie EHU adnaviŭ pracu ŭ Vilniusie ŭ statusie biełaruskaha ŭniviersiteta ŭ vyhnańni. U VNU vučycca kala 1.500 studentaŭ, pieravažna ź Biełarusi.
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie12
Kamientary