Łukašenka viadzie pieramovy z Hiermanijaj i Francyjaj

Pasoł Francyi Mirej Miuso ŭ paniadziełak zajaviła: «My viedajem, jakuju rolu ŭ hetym [palitviaźniaŭ Daškieviča i Aŭtuchoviča] vyzvaleńni adyhraŭ spadar Łukašenka. Pa pryčynach, jakija ja b nie chacieła tut tłumačyć, pasoł Niamieččyny adyhraŭ sapraŭdy asablivuju rolu». Miuso taksama zajaviła, što Francyja hatovaja supracoŭničać ź Biełaruśsiu ŭ spravach pabudovy AES.

Adkazvajučy na pytańnie, što ŭ śviatle adzinaj palityki Eŭrasajuzu ŭ dačynieńni da Biełarusi aznačaje sustreča biełaruskaha prezydenta i pasła Niamieččyny, spn. Miuso zaznačyła:

«Isnuje adzinaja eŭrapiejskaja palityka. I hetaja palityka zaklučajecca ŭ tym, kab havaryć ab nieabchodnaści pradstaŭleńnia demakratyčnym siłam mahčymaści vykazvać svaje mierkavańni. My vitajem vyzvaleńnie palitźniavolenych i spadziajomsia, što buduć i nastupnyja vyzvaleńni. I my viedajem, jakuju rolu ŭ hetym vyzvaleńni zhulaŭ spadar Łukašenka. Pa pryčynach, jakija ja b nie chacieła tut tłumačyć, pasoł Niamieččyny zhulaŭ sapraŭdy asablivuju rolu, i ja ščaślivaja, što jon hetaj svajoj asablivaj rolaj prynios niejki ŭkład u vyrašeńnie ŭzhadanych mnoj pytańniaŭ».

Adkazvajučy na pytańnie pra mahčymy ŭdzieł Francyi ŭ pabudovie biełaruskaj AES, ambasadarka zaŭvažyła, što jašče naprykancy 2006 h. jaje papiarednik sadziejničaŭ naładžvańniu kantaktaŭ biełaruskich uładaŭ z francuskimi specyjalistami ŭ sfery atamnaj enerhietyki. Hetu palityku Francyja pradoŭžyć i ŭ dalejšym, padkreśliła spn. Miuso. «Ciapier, kali tak možna skazać, miač, z adnaho boku, na baku tych, chto chacieŭ by pabudavać stancyju, z druhoha – na baku tych, chto moh by jaje pabudavać. Što datyčyć Francyi, to tut viadziecca pra pryvatnuju kampaniju «Apeva». Biełaruskaje pasolstva ŭ Francyi moža ŭstaloŭvać kantakty pamiž zacikaŭlenymi strukturami ŭ Biełarusi i pradstaŭnictvam francuskaj kampanii”, – adznačyła pasoł Francyi. Mirej Miuso dadała, što francuskija ŭłady byli b zacikaŭleny ŭ tym, kab biełaruskaja AES była absalutna biaśpiečnaj i adpaviadała ŭsim standartam MAHATE. «Upeŭniena, što biełaruskija ŭłady, uličvajučy horki vopyt čarnobylskaj katastrofy, prykładuć maksymum namahańniaŭ dla zabieśpiačeńnia biaśpieki prajektu», — skazała pasoł.

Da lipienia 2008 h. Francyja pradstaŭlaje miascovaje staršynstvo Eŭrasajuzu ŭ Biełarusi ad imia Słavienii. U druhim paŭhodździ Francyja budzie staršyniavać ad svajho imia.

Siamion Piečanko

* * *

Dzianis Mieljancoŭ: U Bruseli sustreča Łukašenki i Vajsa vyklikała šok

«Ź nieaficyjnych krynic viedaju, što sustreča pasła Vajsa z Alaksandram Łukašenkam vyklikała šok i nierazumieńnie u Bruseli. U strukturach ES takaja sustreča nie była zaplanavanaja, jana ŭvohule supiarečyć palitycy Eŭrasajuzu. Mahčyma, Niamieččyna i Francyja niejak skarektavali svaju zamiežnuju palityku ŭ dačynieńni Biełarusi. Nie vyklučaju, što heta moža być źviazana z adkryćciom u Miensku ofisu Eŭrakamisii. Aficyjnyja ŭłady kažuć, što viaducca pieramovy na hety kont, ale nakolki ja viedaju jany daŭno ścichli, a adkazu nijakaha niama. Nie vyklučaju, što takim čynam spadar Vajs sprabuje ŭsio ž paspryjać adkryćciu hetaha ofisu. Paśla čaho palityka Hiermanii zrobicca takoj, jak była da hetaha. Dumaju, što Francyja moža być zacikaŭlenaj u supracoŭnictvie ź Biełaruśsiu adnosna pabudovy AES. Razam z tym, ja ŭpeŭnieny, što mižnarodnyja kantakty pazytyŭna ŭpłyvajuć na Biełaruś. Heta adkryvaje mahčymaści dla novych suviaziaŭ u palitycy, ekanomicy, tamu sustreču Łukašenki i Vajsa možna aceńvać pazytyŭna».

Zapisaŭ Źmicier Pankaviec

• 0
• 0
• 0
• 0
• 0
• 0
• 0
• 0