Bolšaść biełaruskich bajkieraŭ admoviłasia dałučycca da prabiehu rasijskich «Načnych vaŭkoŭ»
Lidar Kansiervatyŭna-chryścijanskaj partyi — BNF Zianon Paźniak zaklikaŭ biełarusaŭ nie dapuścić prajezdu rasijskich bajkieraŭ pa terytoryi Biełarusi.
Pryblizna tydzień tamu pradstaŭniki rasijskaha kłuba bajkieraŭ «Načnyja vaŭki» abviaścili praviadzieńnie z 25 krasavika pa 9 maja motaprabiehu Maskva — Bierlin cieraź Minsk, Brest, Vrocłaŭ, Brno, Bracisłavu, Vienu, Prahu, Miunchien i inšyja jeŭrapiejskija harady. Na terytoryi Biełarusi jany płanujuć znachodzicca 25—26 krasavika, zajechać u Chatyń, da Kurhana Słavy i ŭ Bresckuju krepaść. Akcyja prymierkavanaja da 70-hodździa Pieramohi.
Zachopu Kryma i Uschodniaha Danbasa Rasijaj papiaredničali ŭ tym liku i prabiehi «Načnych vaŭkoŭ» tudy.
Prezident motakłuba «Načnyja vaŭki» Alaksandr Załdastanaŭ (Chirurh) źjaŭlajecca inicyjataram ruchu «Antymajdan» i ŭvachodzić u lik hramadzian RF, jakija trapili ŭ śpis nieŭjaznych u krainy ES.
Polskija bajkiery i hramadskija aktyvisty ŭžo zajavili pra namier sarvać motaprabieh, jaki jany razhladajuć jak «pačatak rasijskaj ahresii» ŭ Jeŭrasajuzie.
U videazvarocie, raźmieščanym na YouTube, Zianon Paźniak nazvaŭ płany rasijskich bajkieraŭ «nie prosta pravakacyjaj, a nachabnaj pazicyjaj ludziej, jakija nie ličać patrebnym ličycca ni z čym śviatym». «Hetyja ludzi, jakija brali ŭdzieł u akupacyi Ukrainy, jakija vykazvali fašysckija łozunhi, chočuć prajechać pa Biełarusi, jakaja straciła stolki ludziej padčas apošniaj vajny», — zajaviŭ palityk, što z 1996 hoda znachodzicca ŭ emihracyi.
Paźniak adznačyŭ niehatyŭnuju reakcyju palakaŭ na motaprabieh i zaklikaŭ biełaruskaje hramadstva nie dapuścić prajezdu pa krainie «fašysckaj hrupy». «Jość mahčymaść, ludzi, jość moładź, jakaja zdolnaja heta zrabić», — miarkuje lidar KCHP-BNF.
Na jaho dumku, pravakacyja z motaprabieham zadumanaja z metaj pravieryć reakcyju biełarusaŭ: «Kali nie budzie supraciŭleńnia, heta budzie sihnał, što možna praciahvać heta dalej, možna paŭtaryć historyju, jakaja była ŭ Krymie». «Dumaju, što biełarusy skažuć svajo słova, i hetaja banda nie prajedzie», — zaklučyŭ Zianon Paźniak.
Miž tym bajkiery ź biełaruskaha adździaleńnia motakłuba «Načnyja vaŭki» na minułym tydni paviedamili BiełaPAN, što źbirajucca sustreć udzielnikaŭ motaprabiehu na rasijska-biełaruskaj miažy i supravadzić ich da miažy ź ES. Jany majuć namier uzhadnić maršrut motaprabiehu ź miascovymi ŭładami paśla atrymańnia bolš dakładnaj infarmacyi pra akcyju, što rychtujecca.
Pradstaŭniki inšych bajkierskich kłubaŭ (Biełaruskaja asacyjacyja motakłubaŭ abjadnoŭvaje 10 kłubaŭ) nie źbirajucca dałučacca da motaprabiehu, spasyłajučysia na ŭłasnyja płany. A ŭ motakłubie Racing Clan BiełaPAN prosta zajavili, što nie ŭdzielničajuć u motaprabiehu, bo jon «patychaje palitykaj».
Pradstaŭnik kłuba Iron Brothers u svaju čarhu paviedamiŭ, što raniej členy rasijskaha kłuba «Načnyja vaŭki» prapanoŭvali im pajechać u Łuhanskuju i Danieckuju vobłaści, ale atrymali admovu.
Ciapier čytajuć
«Ja nie sustrakaŭ nivodnaha vajskoŭca, chto b nie pavažaŭ Drapataha»: na čale USU staŭ kamandzir novaha pakaleńnia. Što ŭjaŭlaje saboj Michaił Drapaty?1414
Kamientary