BATE atrymaŭ treciuju zapar suchuju pieramohu. «Dynama» i «Šachcior» zhulali ŭničyju

Hości z paŭdniovaha ŭschodu Biełarusi ŭ mižsiezońnie istotna abnavili svaje šerahi. Kamandu pakinuli amal usie ŭzrostavyja i daśviedčanyja futbalisty (za vyklučeńniem Bliźniuka, Sitko, Haŭryłoviča i Savaśćianava).

Faktyčna, u asnovie palešukoŭ siońnia vychodziać učorašnija dublory. I treba skazać, što z takimi hulcami «Homiel» nie pavinien prapaści.

Pierad pačatkam siezona mnohija pradkazvali hamielčukam baraćbu za vyžavańnie, adnak u dvuch startavych turach kamanda Uładzimira Holmaka spačatku adužała babrujskuju «Biełšynu», a potym zhulała ŭničyju z hrodzienskim «Niomanam». Zrešty, možna skazać, što ŭzrovień papiarednich supiernikaŭ — heta nie raŭnia BATE. Tamu mienavita sustreča ŭ Barysavie pavinna była stać ekzamienam dla «Homiela».

I hości siabie zusim nie zhańbili.

Naturalna, što ŭvieś matč BATE pastupova nahniataŭ situacyju la vałodańnia Andreja Sakoviča. Adnak bramnik i abarona dziejničali davoli ŭpeŭniena. Bieź lišniaj mituśni i niervovych ruchaŭ. Možna navat skazać, što za pieršy tajm barysaŭcy tak i nie zmahli stvaryć nivodnaha vartaha momanta. Časam «bieła-zialonyja» hości davoli vostra padychodzili da vałodańniaŭ Siarhieja Černika.

U druhim tajmie kłas haspadaroŭ usio ž skazaŭsia. Na 57-j chvilinie, mabyć, adzinuju pamyłku ŭ hulni dapuściŭ Andrej Sakovič. Bramnik «Homiela» nie daciahnuŭsia da miača paśla naviesa Filipa Mładzienaviča. Na dalokaj štanzie takim padarunkam skarystaŭsia Ihar Stasievič. Karenny barysaviec Stasievič zabiŭ svoj pieršy hoł za BATE paśla viartańnia.

A na 75-j chvilinie kapitan BATE (Lichtarovič na toj momant užo byŭ zamienieny) Vital Radzivonaŭ vyjhraŭ spryntarski zabieh u abaroncy «Homiela» i trapna prabiŭ — 2:0.

Barysaŭcy ŭpeŭniena atrymlivajuć čarhovuju pieramohu ŭ čempijanacie. U dadatak kamanda Alaksandra Jermakoviča pakul nie prapuściła nivodnaha hoła ŭ hetym pieršynstvie.

«Homiel» ža, vidavočna, sioleta jašče papje kryvi ŭ mnohich favarytaŭ.

***

Taksama siońnia ŭ centralnym pajadynku tura salihorski «Šachcior» i minskaje «Dynama» nie zmahli vyjavić pieramožcu – 0:0.

Minčuki pad kiraŭnictvam čecha Dušana Uhryna nie majuć nivodnaj pieramohi ŭ čempijanacie.

Astatnija sustrečy prynieśli nastupnyja vyniki:

«Hranit» — «Dynama» (Brest) — 1:0 (Łucevič); «Minsk» — «Słuck» — 2:0 (Chvaščynski, Rusak); «Nioman» — «Biełšyna» — 1:3 (Bombiel-pienalci; Bahunoŭ, Aniukievič-aŭtahoł, Ražok).

Turnirnaja tablica pakul maje nastupny vyhlad:

BATE — 9 punktaŭ (3 hulni), «Dynama» (Brest) — 6 (3), «Šachcior», «Hranit» — pa 5 (3), «Biełšyna», «Homiel», «Minsk» — pa 4 (3), «Viciebsk», «Naftan» — pa 2 (2), «Dynama» (Minsk), «Nioman» — pa 2 (3), «Tarpieda-BiełAZ», «Słavija» — pa 1 (2), «Słuck» — 1 (3).

Zaŭtra hulajuć: «Viciebsk» — «Naftan».

U paniadziełak tur skončycca sustrečaj «Tarpieda-BiełAZ» — «Słavija».

• 0
• 0
• 0
• 0
• 0
• 0
• 0
• 0