«Hazprom» pahražaje z aŭtorka na čverć skaracić padaču hazu va Ŭkrainu, kali za paniadziełak Ukraina nie raspłacicca z zapazyčanaściami pa biahučych płaciažach. Julija Cimašenka zajaviła, što poŭny ŭzajemaraźlik adbudziecca tolki ŭ tym vypadku, kali Rasieja admovicca ad systemy pastaŭki hazu praz pasiarednikaŭ i piarojdzie da pramych damovaŭ. Dadaŭsia kamentar eksperta Taciany Manionak
«Hazprom» pahražaje z aŭtorka na čverć skaracić padaču hazu va Ŭkrainu, kali za paniadziełak Ukraina nie raspłacicca z zapazyčanaściami pa biahučych płaciažach. Pra heta ŭ paniadziełak zajaviŭ pres-sakratar staršyni praŭleńnia AAT «Hazprom» Siarhiej Kupryjanaŭ.
Kupryjanaŭ supravadziŭ svoj ultymatum pryvyčnaj statystykaj: 1 młrd 700 młn kubametraŭ rasiejskaha hazu «asieli» na Ukrainie za studzień — luty 2008 hodu, davodziŭ jon u žyvym efiry radyjostancyi «Echo Moskvy». Pry hetym, pavodle jahonych słovaŭ, «uvieś hety abjom spažyvajecca nasielnictvam Ukrainy i pradpryjemstvami kamunalnaj haspadarki biez anijakich dakumentaŭ».
U suviazi z hetym u vypadku, kali nijakich damoŭlenaściaŭ pa apłacie za haz z ukrainskim bokam dasiahnuta nia budzie, z ranku aŭtorka «Hazprom» skarocić pastaŭki hazu na Ukrainu na čverć, zajaviŭ Kupryjanaŭ. Pry hetym jon udakładniŭ, što buduć abmiežavanyja tolki pastaŭki rasiejskaha hazu, a tranzyt hazu z Centralnaj Azii budzie ažyćciaŭlacca ŭ poŭnym abjomie.
Pazycyja ŭkrainskaha ŭradu zastałasia niaźmiennaju: Julija Cimašenka prapanoŭvaje poŭny ŭzajemaraźlik, ale tolki ŭ tym vypadku, kali Rasieja admovicca ad systemy pastaŭki hazu praz pasiarednikaŭ i piarojdzie da pramych damovaŭ.
Schiema pastavak turkmienskaha hazu pa hazpromaŭskich hazapravodach, ale praz pasiarednickuju kampaniju «RosUkrEnerha» była naviazanaja Ŭkrainie ŭ 2005 hodzie. «RosUkrEnerha» — struktura nastolki tajamničaja, što dahetul nichto da kanca nia viedaje, chto za joju staić. Mierkavałasia, što jaje prybytkami rasparadžajucca asoby, blizkija da Pucina.
Sioletni hazavy kanflikt nahadvaje raniejšyja sutyknieńni Rasiei z Ukrainaj i Biełaruśsiu. Choć Maskva zaviaraje krainy Eŭrasajuzu, što abmiežavańnie pastavak ich nie zakranie, u Eŭropie narastaje zaniepakojenaść.
Urad Cimašenki pieražyvaje najbolšaje vyprabavańnie. Ad jaho zdolnaści procistajać šantažu zaležyć jaho tryvałaść, a razam z tym — i tryvałaść eŭrapiejskaha vybaru Ŭkrainy.
***
«Hazprom» pieranios termin mahčymaha skaračeńnia pastavak hazu va Ŭkrainu z 10:00 da 18:00 12 lutaha 2008, paviedamiŭ aficyjny pradstaŭnik hazavaha chołdynhu Siarhiej Kupryjanaŭ.
Pavodle jaho, takaja damoŭlenaść dasiahnutaja ŭ ramkach siońniašniaj sustrečy kiraŭnictva NAK «Naftohaz» Ukrainy i «Hazprama». Pra padrabiaznaści sustrečy S. Kupryjanaŭ paviedamić admoviŭsia, paviedamlaje RBK‑Ukrajina.
***
Taciana Manionak: Maskva baicca našaha hiešeftu z Ukrainaj
Taciana Manionak: «Ukrainski bok nia maje adzinstva — Julija Cimašenka poŭnaja rašučaści prybrać usich pasiarednikaŭ z sfery tranzytu hazu, Viktar Juščanka hatovy razmaŭlać z pasiarednikam, jaki zadavolić umovy Ŭkrainy. Apošniaje słova za Juščankam, jaki zaŭtra naviedaje Maskvu. «Hazpram» vidavočna nie žadaje pahłybleńnia kanfliktu, pra što śviedčać i sastupki, prapanavanyja Ŭkrainie, i adciahvańnie mahčymaha skaračeńnia pastavak hazu. U Maskvie čakajuć vynikaŭ vizytu ŭkrainskaha prezydenta. «Hazpram» vykazaŭ hatoŭnaść pracavać biez pasiarednikaŭ, ale maje i svaje ŭmovy — ekanamičnaja metazhodnaść naŭprostavych pastavak, dostup da ŭkrainskich spažyŭcoŭ hazu, dola ŭ haza‑transpartnaj systemie krainy.
Što da biełaruska‑ŭkrainskich hazavych stasunkaŭ, to varta zaznačyć, što peŭnyja pieramovy vialisia ciaham apošnich hadoŭ. Pamiž krainami byli aprabavanyja adpaviednyja zachady i jany mieli efekt — maju źviestki, što Rasieju hiešefty Biełarusi i Ŭkrainy ŭ sfery tranzytu vielmi napałochali. Ale pakul my bačym, što kožny bok addaje pieravahu paasobnym pieramovam z Rasiejaj. Biełaruś vidavočna kirujecca damoŭlenaściami, dasiahnutymi naprykancy 2006 hodu i pakul hety kurs zastajecca niaźmiennym. Toje, što cana hazu dla Biełarusi na I kvartał hetaha hodu była ahučanaja paśla vizytu da nas Uładzimiera Pucina, jašče raz śviedčyć, što pytańnie vyrašałasia ŭ palityčnaj płoskaści. Biełaruski bok karystajecca pieradvybarčaj sytuacyjaj u Rasiei vielmi aktyŭna. Heta źviazana z rostam cany na naftu i, adpaviedna, niepaźbiežnym rostam cany hazu. Pa papiarednich źviestkach pa stanie na 1 studzienia 2009 h. rasiejski haz budzie kaštavać dla nas kala $203 za tys. kub. m. Na apošnich pieramovach, što adbylisia z sankcyi kiraŭnika rasiejskaha ŭradu Viktara Zubkova, biełaruskaja delehacyja vystupała za pierahlad hetaj ličby. Pieramovy pakul skončylisia biezvynikova i majuć adnavicca ŭ sakaviku. Nia vyklučana, što i tut nie abydziecca biez palityčnaha aspektu.
Takim čynam, biełaruski bok kirujecca karotkaterminovymi perspektyvami atrymańnia ad «Hazpramu» sastupak — fiksavańnia niachaj i na karotki termin cenaŭ, «persanalnaj» formuły raźliku cany na haz i h. d. Urad karystajecca tym, što rasiejcy nie hatovyja da hazavaj vajny na dva fronty, ale i sam nie namahajecca razzłavać manapoliju, zvažajučy na bahaty vybar u apošniaj sposabaŭ upłyvu na našuju ekanomiku. Na žal, našaja enerhietyčnaja zaležnaść, i biez taho tatalnaja, jašče bolš pahłyblajecca, i ŭ karotkaj perspektyvie nie vypadaje čakać na supolnuju z ukranicami stratehiju dačynieńniaŭ z manapalistam».
Kamientary