Arhanizacyja pa biaśpiecy i supracoŭnictvie ŭ Jeŭropie čakaje, što prezidenckija vybary ŭ Biełarusi projduć u adpaviednaści ź mižnarodnymi standartami, zajaviŭ u intervju BiełaPAN kiraŭnik Biuro pa demakratyčnych instytutach i pravach čałavieka (BDIPČ) ABSIE Michael Hieorh Link, jaki naviedaŭ Minsk 15—16 červienia ŭ składzie delehacyi ABSIE.
«Naša zadača zaklučajecca ŭ tym, kab aceńvać, nakolki vybary adpaviadajuć mižnarodnym standartam ABSIE, — skazaŭ jon. — Ale siońnia my nie možam skazać, jak budzie. My tolki čakajem pazityŭnaha raźvićcia padziej. Rańniaje abviaščeńnie daty vybaraŭ — heta pazityŭny krok. Usie astatnija kryteryi taksama buduć prasočvacca. My budziem uvažliva sačyć za rolaj ŚMI, jakija pišuć pra vybary, pilnuju ŭvahu nadadzim pytańniu roŭnych umoŭ dla ŭsich kandydataŭ, pracesu ich rehistracyi i hetak dalej».
Link paviedamiŭ, što tema prezidenckich vybaraŭ abmiarkoŭvałasia padčas sustreč delehacyi ABSIE z kiraŭnikom dziaržavy, kiraŭnictvam Ministerstva zamiežnych spraŭ, parłamienta i Centrvybarkama, a taksama z pradstaŭnikami hramadzianskaj supolnaści Biełarusi.
«My asabliva padkreślili vialikuju važnaść svoječasovaści zaprašeńnia dla nazirańnia za vybarami. Nam było skazana, što zaprašeńnie budzie nakiravanaje adrazu paśla taho, jak parłamient zaćvierdzić datu praviadzieńnia vybaraŭ», — skazaŭ kiraŭnik BDIPČ.
Link rastłumačyŭ, što zhodna z pryniataj praktykaj adrazu paśla atrymańnia zaprašeńnia BDIPČ nakiruje ŭ Biełaruś acenačnuju misiju, jakaja zatym daść rekamiendacyi nakont taho, ci treba nakiroŭvać u krainu naziralnuju misiju i jaki pavinien być jaje kolkasny skład. Zvyčajna nakiroŭvajecca doŭhaterminovaja naziralnaja misija, jakaja sočyć za chodam usioj vybarčaj kampanii, a taksama karotkaterminovaja misija, jakaja naziraje za chodam hałasavańnia niepasredna ŭ dzień vybaraŭ.
Michael Hieorh Link nie staŭ kamientavać papraŭki ŭ Vybarčy kodeks, jakija nabyli moc u kancy 2013 hoda i, na dumku apazicyi, jašče bolš addalili Biełaruś ad mahčymaści praviadzieńnia svabodnych i spraviadlivych vybaraŭ. «Heta my možam abmiarkoŭvać paśla taho, jak tut papracuje naša acenačnaja misija. Pierš čym my budziem rabić niejkija publičnyja zajavy, my b chacieli pahutaryć z ekśpiertami, pradstaŭnikami CVK i apazicyjnych palityčnych partyj, kab atrymać poŭnuju karcinu. Paśla hetaha budzie padrychtavanaja spravazdača acenačnaj misii, jakaja budzie apublikavanaja, i ŭ joj buduć zakranutyja i hetyja pytańni», — skazaŭ kiraŭnik BDIPČ.
Na prośbu prakamientavać słovy staršyni CVK Lidzii Jarmošynaj pra toje, što ABSIE «zusim niesamastojnaja arhanizacyja» i BDIPČ pryznaje vybary ŭ Biełarusi demakratyčnymi tolki tady, «kali jamu vyznačać heta ZŠA» (pra heta Jarmošyna zajaviła ŭ intervju BiełaPAN u krasaviku 2014 hoda), Link zajaviŭ: «Na sustrečy sa mnoj takoje mierkavańnie abnarodavanaje nie było». «Ja b chacieŭ zaznačyć, što kali ja ŭbaču, što BDIPČ nie źjaŭlajecca niezaležnym, to ja, biezumoŭna, pakinu svaju pasadu», — dadaŭ jon.
Link padkreśliŭ, što ŭ pracy BDIPČ «niama daminavalnaj roli nivodnaj z krain». «My pravodzim našy naziralnyja misii prafiesijna i niepraduziata. I heta vidavočna — pahladzicie na apošnija vybary ŭ Turcyi, Kazachstanie, Małdovie. Mnie zdajecca, jość dakładnyja sihnały pra toje, što my naležnym čynam robim svaju spravu. Našy zaklučeńni pavodle vynikaŭ nazirańniaŭ hruntujucca na abjadnanych vysnovach našych doŭhaterminovych i karotkaterminovych naziralnych misij. I jany dakładna nie napisanyja pavodle niečaha zahadu», — padkreśliŭ kiraŭnik BDIPČ ABSIE.
Kamientary