Stan paciarpiełaj u kobrynskim akvaparku siamihadovaj dziaŭčynki, jakaja znachodzicca ŭ Bresckaj dziciačaj abłasnoj balnicy, zastajecca vielmi ciažkim, paviedamiŭ zahadčyk reanimacyjnaha adździaleńnia balnicy Valeryj Čarankievič.
«Dziaŭčynka pa-raniejšamu znachodzicca ŭ komie, padklučana da aparatu štučnaj vientylacyi lohkich. Jana tak i nie aprytomnieła», — skazaŭ urač.
Jak raniej paviedamlałasia, 12 červienia siamihadovaja dziaŭčynka naviedvała akvapark u składzie ekskursii z nastaŭnikami svajoj bazavaj škoły Drahičynskaha rajona. Kala 15.30 adzin z naviedvalnikaŭ dastaŭ jaje z-pad vady biez prytomnaści.
Dzicia z dyjahnazam «utapleńnie ŭ presnaj vadzie» spačatku dastavili ŭ Kobrynskuju centralnuju rajonnuju balnicu, zatym u Bresckuju dziciačuju abłasnuju balnicu.
Kobrynskim rajonnym adździełam Śledčaha kamiteta ŭ dačynieńni da dvuch nastaŭnikaŭ hetaj škoły, jakija źjaŭlalisia supravadžajučymi ekskursijnaj hrupy, raspačataja sprava na padstavie č. 1 art. 165 KK (nienaležnaje vykanańnie abaviazkaŭ pa harantavańni biaśpieki žyćciu i zdaroŭja dziaciej).
Zhodna z materyjałami śledstva, paciarpiełaja znachodziłasia biez nahladu nastaŭnikaŭ bolš jak 10 chvilin. Na videazapisach z kamier nazirańnia bačna, jak dziaŭčynka idzie ŭ bolš hłybokuju častku basiejna. U miescy, dzie jaje znajšoŭ naviedvalnik, ahladnaść kamier abmiežavanaja zbudavańniami akvaparku.
Kančatkovaja kvalifikacyja dziejańniaŭ nastaŭnikaŭ i inšych adkaznych asob budzie vyznačanaja padčas rasśledavańnia, kantrol za jakim viadzie kiraŭnictva Śledčaha kamiteta.
Kamientary