Demanstranty, jakija vystupajuć suprać padaražeńnia elektraenierhii ŭ Armienii, vyjšli na vuličnyja akcyi ŭ piaci haradach krainy — Jerevanie, Hiumry, Vanadzory, Aštaraku i Abavianie.
U stalicy Armienii na praśpiekcie Bahramiana sabralisia tysiačy čałaviek. Pikiety taksama zapłanavany la armianskich pasolstvaŭ za miažoj, paviedamlaje meduza.io.
Kolkaść udzielnikaŭ akcyi pratestu ŭ centry Jerevana raście ŭ hieamietryčnaj prahresii, piša armtoday.
Da ŭdzielnikaŭ akcyi pratestu na praśpiekcie Bahramiana dałučylisia niekalki tysiač čałaviek. Praśpiekt Bahramiana ad skryžavańnia Isaakiana da płoščy Francyi pierapoŭnieny ludźmi, i patok ludziej nie spyniajecca. Adnačasova ź placa Brazilii ŭ chutkim časie startuje pratestny aŭtaprabieh, udzielniki jakoha taksama dałučacca da pratestoŭcaŭ.
Da demanstrantaŭ pryjechaŭ načalnik palicyi Jerevana Valeryj Asipian, a taksama načalnik palicyi Armienii Uładzimir Hasparan.
***
Na adrezku Isaakiana i Bahramiana praktyčna niama palicejskich. Stajać tolki žaleznyja aharodžy. Ledź vyšej — vadamioty i skancentravanyja siły palicyi, adnak palicejskich kardonaŭ u niekalki šerahaŭ, jak napiaredadni, niama.
Na ŭsie prapanovy ŭładaŭ pačać pieramovy va ŭdzielnikaŭ akcyi pratestu ŭ centry Jerevana adzin adkaz — kambinacyja z troch palcaŭ.
«Nam ź imi abmiarkoŭvać niama čaho», — adznačajuć udzielniki akcyi pratestu.
Inicyjatary ruchu «Nie rabavańniu» znoŭ zajaŭlajuć, što arhanizavanaja na praśpiekcie Bahramiana akcyja nosić vyklučna mirny charaktar.
«Ludzi z nažami, kamianiami, butelkami sychodzicie, nam z vami nie pa darozie. U nas mirnaja akcyja », — adznačajuć arhanizatary, dadajučy, što palicyja spakojna moža «zabirać» takich ludziej. Taksama pratestoŭcy nastojliva prosiać palicejskich u cyvilnym pakinuć ich šerahi, piša armtoday.
«My ŭsie vas bačyli, u nas vašyja fatahrafii. Sychodźcie!», — adznačajuć jany. Ludzi skandujuć «Uciakajcie adsiul!!!»
Akcyja pratestu na praśpiekcie Bahramiana nabiraje abaroty. Usio bolšaja kolkaść ludziej dałučajecca da pratestoŭcaŭ. Ludzi słuchajuć muzyku, tančać i śpiavajuć. Pieryjadyčna arhanizatary pieraryvajuć muzyku dla abjavaŭ.
Udzielniki akcyi patrabujuć admieny rašeńnia ab pavyšeńni taryfaŭ na elektraenierhiju. Jany admovilisia ad sustrečy z prezidentam krainy Sieržam Sarhsianam, zajaviŭšy, što im niama čaho abmiarkoŭvać i adzinaje čaho jany chočuć — admiena nazvanaha rašeńnia.
***
Raniej armianskija ŚMI paviedamili, što prezident krainy vyrašyŭ pierahledzieć rašeńnie ab pavyšeńni taryfaŭ, adnak aficyjnaha paćvierdžańnia hetaj infarmacyi niama. Paźniej hetuju infarmacyju tym ža ŚMI abvierhła krynica ŭ administracyi prezidenta. Sami inicyjatary akcyi pratestu nie vierać infarmacyi ŚMI, zajaŭlajučy, što majuć namier dačakacca aficyjnaj zajavy ŭładaŭ.
Pratestoŭcy patrabujuć admieny rašeńnia Kamisii pa rehulavańni hramadskich pasłuh ad 17 červienia ab pavyšeńni z 1 žniŭnia taryfu na elektraenierhiju na 16%.
Siabra inicyjatyvy «Nie rabavańniu!» Vahinak Šušanian u hutarcy z Radyjo Svaboda paviedamiŭ, što akcyi pratestu z patrabavańniem admianić rašeńnie ab pavyšeńni taryfu na elektraenierhiju pačalisia taksama ŭ Vanadzory, Aštaraku, Sisianie, Hiumry, Śpitaku. Šušanian dadaŭ, što jany nie pieratvorać akcyi pratestu ŭ Majdan.
***
Espreso.tv: Jak Pucin zapuściŭ Majdan u Armienii
Rasijskaja piatla na ekanomicy Armienii prymusiła žycharoŭ krainy zładzić ułasny Majdan.
U stalicy Armienii z 19 červienia praciahvajucca akcyi pratestu suprać čarhovaha rostu płaty za elektraenierhiju. Taryf byŭ pavyšany na 16,5% — da 48,78 drama (kala 0,10 dalaraŭ) za kVt/h, što pry hrubym raźliku ŭ piać razoŭ vyšej za košty taryfaŭ va Ukrainie. Da hetaha ceny na kiłavaty ŭžo ŭzdymali amal udvaja.
Niadaŭna kampanija-manapalist «Elektryčnyja sietki Armienii» zrabiła novuju zajaŭku na pavyšeńnie taryfaŭ dla nasielnictva, choć užo pavyšała apłatu.
Hałoŭnaja enierhietyčnaja kampanija Armienii naležyć Rasii. U 2005 hodzie jaje nabyła napałovu dziaržaŭnych «Inter RAT», jakoj kiruje prezident «Rośniefci» Ihar Siečyn. Ale elektryčnyja sietki — tolki viaršynia ajśbierha.
Kreml tym ci inšym čynam prysutničaje amal va ŭsich stratehična važnych pradpryjemstvach Armienii. Naprykład, u 2014 «Hazprom» staŭ uładalnikam 100% akcyj pastaŭščyka hazu ŭ Armieniju — kampanii «ArmRoshazprom».
Tamu niadziŭna, što z časam na «kamunalnym» mitynhu źjavilisia łozunhi suprać «rasijskaj akupacyi» Armienii, karupcyi ŭ vyšejšych ešałonach ułady i prezidenta Sierža Sarhsiana. Ludzi vyjšli na vulicy z płakatami «My, armianie, — haspadary našaj krainy».
U vieraśni 2013 hoda Armienija admoviłasia parafiravać asacyjacyju ź Jeŭrasajuzam i vybrała Rasiju, ustupiŭšy ŭ Mytny, a zatym i ŭ Jeŭrazijski ekanamičny sajuz.
Ekanomika Rasii, jakaja pieražyvaje nie lepšyja časy, i padzieńnie rubla padkasiła i Armieniju. Kraina tradycyjna ekspartuje ŭ Rasiju sadavinu, harodninu, vino, kańjak, kansiervy. «Palapšeńnie», jakoje tak ščodra abiacali ŭ Kramli, tak i nie nastupiła.
Časta možna sustreć mierkavańnie, što heta metanakiravanaja palityka rasijskich uładaŭ. Meta jakoj - skupić reštki armianskich aktyvaŭ partniorami Uładzimira Pucina pa biźniesie.
Źniešni handal, pa vynikach pieršaha kvartała skłaŭ $945,1 młn, skaraciŭšysia na 28%, pryčym źniziŭsia jak impart (na 30,5%), tak i ekspart (prykładna na 23%). Akramia taho, pa dadzienych Centrabanka Armienii, za apošni hod (z červienia 2014 pa červieni 2015 hoda) devalvacyja drama skłała 15%.
Prahnozy ekśpiertaŭ taksama niesuciašalnyja. Mnohija ź ich kažuć ab tym, što ekanomika Rasii rujnujecca na vačach i paciahnie za saboj ekanomiku Armienii. Paśla ŭdziełu ŭ Jeŭrazijskaj ekanamičnaj sajuzie Jerevan staŭ jašče bolš zaležnym ad nie zaŭsiody łahičnych dziejańniaŭ Kramla.
Kamientary