Studenckija pratesty ŭ Indyi stali prablemaj dla premjera Modzi. Adkul uziaŭsia ruch «tarakanaŭ»?
U roznych haradach Indyi ŭ sieradu adbylisia sutyknieńni pamiž členami kiroŭnaj partyi, hałoŭnaj apazicyjnaj partyi, studentami i palicyjaj.
Usio pačałosia z vystupleńniaŭ satyryčnaj «Narodnaj partyi tarakanaŭ», jakaja zapatrabavała adstaŭki ministra adukacyi paśla ŭciečki ekzamienacyjnych materyjałaŭ i časovaha błakavańnia ŭładami Telegram, piša Bi-bi-si.
U paniadziełak tysiačy prychilnikaŭ nieaficyjnaj «Narodnaj partyi tarakanaŭ» sabralisia ŭ Deli i pasprabavali prajści maršam da parłamienta. Paśla hetaha adbylisia sutyknieńni z palicyjaj, u vyniku jakich, pavodle zajaŭ bakoŭ, byli paranieny kala 60 pratestoŭcaŭ i 118 palicejskich.
U aŭtorak spadkajemca viadomaj indyjskaj palityčnaj dynastyi Rachuł Handzi i inšyja lidary hałoŭnaj apazicyjnaj partyi «Indyjski nacyjanalny kanhres» padtrymali «Partyju tarakanaŭ» i arhanizavali marš da rezidencyi premjer-ministra i lidara partyi «Bcharatyja džanata parci» (Indyjskaja narodnaja partyja) Narendry Modzi. Tam adbyłasia sutyčka z palicyjaj, jakaja z užyvańniem siły zatrymała Handzi i inšych lidaraŭ INK, ale paźniej ich adpuściła.
U sieradu Handzi zapatrabavaŭ adstaŭki ministra adukacyi Dcharmiendry Pradchana i prabačeńniaŭ ad premjer-ministra Modzi za razhon studenckaj demanstracyi 20 lipienia.
U hety ž dzień členy INK i BDP vyjšli na akcyi i maršy ŭ roznych haradach Indyi, dzie ŭ šerahu miescaŭ adbylisia sutyknieńni — jak pamiž saboj, tak i z palicyjaj.
Jak paviedamlaje indyjskaje infarmacyjnaje ahienctva PTI, u Chajdarabadzie, stalicy štata Tełanhana, u vyniku sprobaŭ členaŭ dźviuch partyj prajści maršam da štab-kvater apanientaŭ i ich błakavańnia palicyjaj byli paranieny dva čałavieki, u tym liku supracoŭnica palicyi.
U stalicy štata Bichar, horadzie Patna, členy BDP pryjšli maršam da štab-kvatery INK, dzie apazicyjaniery atakavali ich, uzbroiŭšysia bambukavymi pałkami. Paśla hetaha ŭ situacyju ŭmiašałasia palicyja.
«U niekalkich čałaviek byŭ mocny kryvaciok», — pieradaje PTI.
Adnačasova ŭ Patnie, kala parłamienta štata, adbyłasia, jak piša ahienctva, «bitva ścienka na ścienku pamiž sotniami studentaŭ i palicyjaj». Častka studentaŭ prarvałasia na terytoryju parłamienta, praz što jaho administracyja na niekatory čas zamknuła budynak razam z deputatami ŭnutry.
U horadzie Vidžajavada ŭ štacie Andchra-Pradeš členy INK i BDP ustupili ŭ pramoje sutyknieńnie.
Padobnaje supraćstajańnie z uźviadzieńniem barykad i ŭmiašańniem palicyi adbyłosia i ŭ horadzie Džamu kala štab-kvatery adździaleńnia INK u štacie Džamu i Kašmir.
U Deli padčas akcyi byŭ zatrymany kiraŭnik staličnaha adździaleńnia INK Deviender Jadaŭ i niekalki jaho paplečnikaŭ.
U Mumbai padčas maršu da štab-kvatery adździaleńnia BDP u štacie Macharaštra razam ź niekalkimi paplečnikami byŭ zatrymany kiraŭnik adździaleńnia INK u štacie Charšvardchan Sapkal.
«Narodnaja partyja tarakanaŭ» — heta satyryčny niefarmalny ruch, stvorany ŭ internecie palittechnołaham Abchidžytam Dypkie 16 maja hetaha hoda.
Za dzień da hetaha staršynia Viarchoŭnaha suda Indyi Surja Kant nazvaŭ «tarakanami» i «parazitami» biespracoŭnych maładych indyjcaŭ, jakija zajmajucca žurnalistykaj abo iduć u palityčnyja aktyvisty.
U adkaz na chvalu abureńnia jon patłumačyŭ, što mieŭ na ŭvazie tolki tych maładych ludziej, jakija atrymlivajuć dypłomy ašukanskim šlacham. Na toj momant Viarchoŭny sud jakraz pavinien byŭ razhladać adpaviednuju spravu.
«Partyja tarakanaŭ» imhnienna nabrała sotni tysiač prychilnikaŭ i miljony padpisčykaŭ u sacyjalnych sietkach, a ŭžo praź niekalki tydniaŭ paśla stvareńnia atrymała nahodu «vyjści ŭ afłajn».
U siaredzinie červienia indyjskija ŭłady za niekalki dzion da paŭtornaha nacyjanalnaha ŭstupnaha ekzamienu NEET-UG u miedycynskija VNU časova zabłakavali Telegram, aścierahajučysia, što miesiendžar mohuć vykarystoŭvać dla śpisvańnia.
Da hetaha, u pačatku maja, z-za ŭciečki ekzamienacyjnych zadańniaŭ byli anulavanyja vyniki pieršaha ekzamienu. Apanienty ŭrada — nie tolki «Partyja tarakanaŭ», ale i apazicyja, pravaabaroncy dy zvyčajnyja karystalniki internetu — raskrytykavali zabaronu, zajaŭlajučy, što prablema nie ŭ tym ci inšym miesiendžary, a ŭ karumpavanych čynoŭnikach Ministerstva adukacyi, jakija dapuścili ŭciečku.
«Narodnaja partyja tarakanaŭ» zaklikała svaich prychilnikaŭ vychodzić na pratesty. Ciapier u jaje pratestavym łahiery kala staradaŭniaj absiervatoryi Džantar-Mantar u centry Deli źbirajucca tysiačy maładych ludziej, a na demanstracyju 20 lipienia vyjšli dziasiatki tysiač čałaviek.
«Partyja tarakanaŭ» patrabuje adstaŭki ministra adukacyi, a taksama vypłaty kampiensacyi ŭ pamiery 10 młn rupij (kala 100 tysiač dalaraŭ) siemjam tych, chto skončyŭ žyćcio samahubstvam paśla anulavańnia vynikaŭ pieršaha ekzamienu.
Ułady pakul nie źbirajucca iści na sastupki. Vysokapastaŭleny pradstaŭnik ułady ŭ sieradu paviedamiŭ ahienctvu PTI, što ministr adukacyi Dcharmiendra Pradchan u adstaŭku nie sydzie.
«Pra adstaŭku ministra adukacyi navat nie idzie havorka. Takoje pytańnie naohuł nie razhladajecca. Nielha vinavacić ministra va ŭciečcy ekzamienacyjnych zadańniaŭ, bo jon asabista da hetaha nie datyčny», — skazaŭ surazmoŭca ahienctva i dadaŭ, što paŭtorny ekzamien, da taho ž, prajšoŭ paśpiachova.
Kamientary