Upieršyniu za doŭhi čas pradstaŭniki apazicyi mahli vykazacca ŭ efiry telekanała «Biełaruś-1». Namieśnik staršyni Partyi BNF Ryhor Kastusioŭ, a taksama dyrektar centra Mizesa Jarasłaŭ Ramančuk byli haściami pieradačy «Forum». Temaj razmovy byli prezidenckija vybary.
Varta adznačyć, što pradstaŭniki niezaležnaha hramadstva zaŭsiody zaprašajucca ŭ pieradaču «Sprava pryncypa» na telekanale ANT. Haściami šou Vadzima Hihina byli Alaksandr Kłaskoŭski, Valer Karbalevič, Valer Bułhakaŭ, Aleh Trusaŭ i niekatoryja inšyja. A voś na «Biełaruś-1» dostup byŭ pa-raniejšamu zakryty.
Ryhor Kastusioŭ kaža, što byŭ ździŭleny takomu zaprašeńniu. «Tym nie mienš, treba vykarystoŭvać lubuju mahčymaść vykazać svaje dumki – chaj na telebačańni, na radyjo, u hazietach. U takich pieradačach treba kazać vielmi aściarožna, kab ciabie nie vystavili ŭ niepryvabnym vyhladzie. Dziakuj Bohu, aŭtary pieradačy na heta nie pajšli», — raskazvaje Kastusioŭ.
Apanientami Ramančuka i Kastusiova byli kamunist Hieorhij Atamanaŭ, fiłosaf Alaksiej Dziermant, ekanamist Michaił Kavaloŭ, sakratar CVK Mikałaj Łazavik.
«U nas z Łazavikom adbyłosia dźvie pierapałki. Pieršaja ŭ pačatku zapisa, kali ja zhadaŭ vypadak z parłamienckich vybaraŭ 2008 hoda, kali naziralnik zafiksavaŭ u Škłoŭskaj akruzie, jak siabry ŭčastkovaj kamisii padpisali pustyja pratakoły. U druhoj pałovie ja skazaŭ, što vybary buduć pryznanyja Jeŭropaj, kali ich nie buduć falsifikavać», — adznačyŭ Ryhor Kastusioŭ.
Tym nie mienš, udzielnik pieradačy kaža, što nianaviści pamiž bakami nie było. «Paśla pieradačy my dobra parazmaŭlali z spadarom Łazavikom, Atamanava ja daŭno viedaju. Nijakaj napružanaści pamiž nami nie było».
Kastusioŭ havoryć, što niekatoryja jahonyja vykazvańni ŭsio ž byli skaročanyja, ale ahulny sens byŭ pieradadzieny.
Kamientary