Hiernat Erler: Rašeńnie pa vizavych sankcyjach suprać biełaruskich čynoŭnikaŭ budzie pryniataje 30 kastryčnika
U Minsku hetymi dniami ź vizitam znachodzicca kaardynatar fiederalnaha ŭrada Hiermanii pa mižhramadskim supracoŭnictvie z Rasijaj, krainami Centralnaj Azii i Uschodniaha partniorstva Hiernat Erler.
Jon siońnia mieŭ sustreču ź ministram zamiežnych spravaŭ Uładzimiram Makiejem, pradstaŭnikami apazicyi (byli Labiedźka, Niaklajeŭ i Rymašeŭski; Taćciana Karatkievič choć atrymała zaprašeńnie, ale nie pryjšła; była asobnaja sustreča ź Mikałajem Statkievičam), a taksama daŭ pres-kanfierencyju dla pradstaŭnikoŭ niedziaržaŭnych ŚMI.
Spadar Erler adrazu adznačyŭ, što jahony vizit staŭ mahčymy paśla taho, jak 22 žniŭnia na volu vyjšli šaściora palitviaźniaŭ.
«Hety krok adkryvaje mahčymaść dla pierazahruzkaj adnosinaŭ Jeŭropy i Biełarusi, — skazaŭ dypłamat. — Chaciełasia b, kab hety pieršy krok mieŭ praciah. U jakaści vyrašalnaj padziei my majem na ŭvazie vybary 11 kastryčnika, jakija źjaŭlajucca łakmusavaj papierkaj, što moža adčynić dźviery ŭ adnosinach Biełarusi jak ź ES, hetak i z Hiermanijaj».
Pradstaŭnik Hiermanii nahadaŭ, što 30 kastryčnika budzie razhladacca pytańnie ab praciahu ci prypynieńni vizavych sankcyj suprać biełaruskich čynoŭnikaŭ. Vyrašalnym faktaram tut znoŭ stanuć prezidenckija vybary.
«Kali acenka vybaraŭ budzie stanoŭčaj, to heta daść mahčymaść vieści palityčny dyjałoh pa sutnaści», — adznačyŭ Hiernat Erler.
Siarod kirunkaŭ dypłamat adznačyŭ spraščeńnie vizavaha režymu dla hramadzian Biełarusi, praviadzieńnia inviestycyjnaj kanfierencyi, dapamoha Biełarusi va ŭstupleńni ŭ Suśvietnuju handlovuju arhanizacyju.
Z nastupnaha hoda Hiermanija budzie staršyniavać u ABSIE, tamu na sustrečy z Uładzimiram Makiejem uzdymałasia pytańnie adkryćcia ŭ Minsku techničnaha biuro ABSIE.
«Urad hatovy ŭzmacnić supracoŭnictva z ABSIE», — adkazaŭ na takija prapanovy Makiej.
Jakaja ž budzie acenka prezidenckaj kampanii, ci možna havaryć pra niejkija vysnovy ŭžo siońnia? «Pradstaŭniki ABSIE pracujuć u Biełarusi ad 26 žniŭnia. Ciapier jany na stadyi zboru infarmacyi. U lubym vypadku kančatkovaje rašeńnie budzie nie palityčnym, a abjektyŭnym», — zapeŭniŭ pradstaŭnik Hiermanii.
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam3030
Kamientary