Nieviadomyja złamali 35 kryžoŭ. Dziesiatki kryžoŭ vyciahnutyja ź ziamli.
Pieršaje, što bačyć kožny, chto patraplaje ŭ Kurapaty praz padziemny pierachod pad Mienskaj kalcavoj darohaj — draŭlany kryž, jaki, niby śmiarotna paranieny, lažyć na baku. 12 sakavika vandały zvalili dy złamali 36 kurapackich kryžoŭ. Zrešty, asnoŭny memaryjalny kompleks alei pamiaci vandały nie zakranuli, robiačy svaju čornuju spravu na ŭskrajku kurapackaha lesu.
Što heta — durnyja harezy kampanii napadpitku ci splanavanaja akcyja vandałaŭ? Sapraŭdy, u hety čas hleba ŭ Kurapatach vilhotnaja, miakkaja. Niekatoryja kryžy dastatkova źlohku kranuć dałońniu — i jany ŭžo chistajucca. Zvalić dva‑try ź ich fizična nie składana. Ale try tuziny kryžoŭ žartam nie pavališ, tut treba mieć rezon dy raźlik. Tym bolš, što miarzotniki sprabavali zvalić i novyja kryžy, umacavanyja žaleznymi plastynami. Tut im davodziłasia ciažej: umacavanyja kryžy hnulisia dy łamalisia, ale mnohija ź ich vytrymlivali nacisk.
Adrazu zaŭvažna, što amal usie kryžy pavalenyja ŭ adzin bok. Kali mierkavać pa ich nakirunku, vandały kročyli ŭzboč lesu, uzdymajučysia z‑za ŭzhorku da mienskaj kalcavoj, metadyčna łamajučy kryžy na svaim šlachu. Zvalać try — piać prapuściać — znoŭ dva‑try zvalać. La adnaho z kryžoŭ lažyć pustaja butelka z‑pad piva ź nierazmokłaj etykietkaj. Sapraŭdy, ciažka ŭjavić, što niechta budzie zajmacca takoj spravaj na ćviarozuju hałavu. La inšaha — zusim cikava: pałova plastykavaj butelki, zapoŭnienaja budaŭničaj zamazkaj, zusim śviežaj, miakkaj. Jaje pyrski i na hlebie, i na kryžy. Kali zirnuć u kirunku, adkul, chutčej za ŭsio, pryjšli vandały, sapraŭdy pabačyš budoŭlu. Adnak ciažka ŭjavić sabie, što niechta budzie nieści praz haru ŭ les brudnuju butelku tolki dla taho, kab vykinuć jaje pad kryž. Moža, vandały naŭmysna pasprabavali zabłytać ślady, zvalić vinu na kahości inšaha?
Valačy kryžy, što šnuram ciahnucca ŭzdoŭž pola, vandały vidavočna nie bajalisia, što ich zaŭvažać — hety kavałak lesu prahladajecca, jak na dałoni. Ci jany rabili heta ŭnačy, dy prosta pabajalisia zahłyblacca ŭ huščar, kab nie pałamać sabie nohi‑ruki?
Pytańniaŭ šat, adkazaŭ niama. Aktyvisty KCHP‑BNF, jakija tradycyjna dahladajuć kurapackija kryžy, abviaścili, što ŭ subotu, 15 sakavika, a 12 hadzinie ŭ Kurapackim lesie pačniecca tałaka. Tych, chto žadaje da jaje dałučycca, prosiać zachapić z saboj instrumenty. Pracy chopić dla ŭsich.
Łukašenka: Pry ciapierašnim ciačeńni vajny Biełaruś z Rasijaj nie zmahli b abaranić biełaruskaj miažy ad Ukrainy20
Łukašenka: Pry ciapierašnim ciačeńni vajny Biełaruś z Rasijaj nie zmahli b abaranić biełaruskaj miažy ad Ukrainy
«70% mastakoŭ u čornych śpisach». Mastak Siarhiej Hrynievič paśla tryumfu ŭ Vieniecyi raskazaŭ pra hady maŭčańnia i pra toje, na jakim śviecie jon apynuŭsia1515
Kamientary