U stalicy Małdovy skončyŭsia mitynh hramadzianskaj płatformy DA («Hodnaść i praŭda»), jaki adbyvaŭsia pad ściahami Małdovy i Jeŭrasajuza.
Pryčym, arhanizavany Płatformaj DA pratest zajmieŭ ramantyčnuju nazvu — «Revalucyja chryzantem». Na płošču pratestoŭcy pryjšli ź biełymi kvietkami.
— Heta vosieńskija kvietki, čystyja, biełyja, — tak patłumačyŭ adzin ź ideołahaŭ Płatformy Ihar Bocan. — Čamu ŭ takim razie nie «Revalucyja chryzantem»?
U mitynhu ŭdzielničali, pavodle roznych źviestak, ad 3 tys. da 10 tys.
Udzielniki dadali da svajoj rezalucyi novaje patrabavańnie — pravieści ŭsienarodny refierendum pa abrańni prezidenta.
«Pierachod da ŭsienarodnych vybaraŭ prezidenta - heta nieabchodnaść, pradyktavanaja sučasnymi realijami. Heta patrabavańnie ŭsiaho naroda Małdovy», — zajaviŭ palitołah i aktyvist DA Ihar Bocan.
Pavodle Kanstytucyi Małdovy refierendum moža być arhanizavany pry padtrymcy adnoj traciny deputataŭ parłamienta abo 200 tys. hramadzian.
Inicyjatyvu ŭsienarodnaha refierendumu paćvierdziŭ i lidar Partyi sacyjalistaŭ Ihar Dodon, jaki braŭ udzieł u inšym prateście — levych sił, la budynka parłamienta ŭ Kišyniovie.
Raniej, u noč ź piatnicy na subotu, levyja pratestoŭcy błakavali praśpiekt Stefana Vialikaha, pastaviŭšy pałatki prama na prajeznaj častcy. U vyniku hramadski transpart byŭ puščany ŭ abjezd. Siońnia, 4 kastryčnika, pałatki byli prybranyja z hałoŭnaj vulicy Kišyniova. Na dumku mera stalicy Małdovy Daryna Kirtaake, pratesty ŭ horadzie arhanizavanyja Maskvoj.
A ŭdzień la budynka parłamienta adbyłasia bojka.
Kala sotni čałaviek, u asnoŭnym, kambatanty (vieterany vajny ŭ Prydniastroŭje 1992 hoda) i «afhancy» z chryzantemami ŭ rukach prarvalisia da parłamienta. Ich užo čakała palicejskaje ačapleńnie.
Pratestoŭcy spadziavalisia z chodu prarvać łancuh, nie atrymałasia. Bojka doŭžyłasia kala chviliny. Zatym sami kambatanty arhanizavali pamiž palicejskimi i natoŭpam žyvy łancuh i adcisnuli ludziej da prystupak, piša kp.md.
Akcyi pratestu suprać małdaŭskich uładaŭ praciahvajucca ŭ centry małdaŭskaj stalicy treci tydzień. Pratestoŭcy patrabujuć adstaŭki ŭsiaho kiraŭnictva krainy i abviaščeńnia daterminovych parłamienckich vybaraŭ. Jany taksama patrabujuć pryciahnuć da kryminalnaj adkaznaści vinavatych u kradziažy bolš jak miljarda dalaraŭ z bankaŭskaj sistemy krainy.
Kamientary