Kampanija «Prava vybaru-2015»: jość razychodžańni ŭ ličbach jaŭki na daterminovaje hałasavańnie
Kampanii nazirańnia «Prava vybaru-2015» ciaham piaci dzion daterminovaha hałasavańnia na vybarach Prezidenta Respubliki Biełaruś ździajśniała nazirańnie na 649 vybarčych učastkach.
Na 577 vybarčych učastkach naziralniki kampanii vałodali ličbami ab ahulnaj kolkaści hramadzian, jakija pražyvajuć na terytoryi vybarčych ŭčastkaŭ, što dało mahčymaść zrabić padlik jaŭki vybarščykaŭ.
Takim čynam na 577 vybarčych učastkach za piać dzion daterminovaha hałasavańnia prahałasavała 299 344 čałaviek. Pavodle aficyjnych źviestak - 313 977.
Razychodžańnie ŭ padliku kolkaści prahałasavaŭšych hramadzian skłała – 14 633 čałavieki, albo 4,89%.
U Minsku niepieraryŭnaje nazirańnie ciaham piaci dzion viałosia na 111 vybarčych učastkach. Tam za piać dzion naziralniki naličyli 46 782 vybarščyki, jakija pryjšli na ŭčastki. Pavodle aficyjnych źviestak na hetych ža ŭčastkach prahałasavała 52 032 čałavieki.
Razychodžańnie ŭ padliku kolkaści prahałasavaŭšych hramadzian skłała –5 250 čałaviek, albo 6,66%.
Pa padliku naziralnikaŭ najbolšaje razychodžańnie ŭ jaŭcy vybarščykaŭ vyjaŭlena na nastupnych učastkach:
№38 Pieršamajskaha rajona Minska: pa źviestkach naziralnikaŭ – 283 čałavieki, pa aficyjnych źviestkach – 627 čałaviek. Roźnica składaje 344 čałavieki, albo 121%;
№11 Baranavičy, Bresckaja vobłaść: pa źviestkach naziralnikaŭ – 583 čałavieki, pa aficyjnych źviestkach – 990 čałaviek. Roźnica składaje 407 čałavieki, albo 70%;
№52 Leninskaha rajona Mahilova: pa źviestkach naziralnikaŭ – 379 čałaviek, pa aficyjnych źviestkach – 677 čałaviek. Roźnica składaje 298 čałaviek, albo 78%.
Najbolšuju kolkaść prahałasavaŭšych za piać dzion daterminovaha hałasavańnia naziralniki zafiksavali na vybarčym učastku №44 u Pieršamajskim rajonie Viciebska. Tam za piać dzion prahałasavała 1675 čałaviek, albo 89,1% ad ahulnaj kolkaści vybarščykaŭ, zarehistravanych na vybarčym učastku. Aficyjnaja jaŭka nie razychodzicca z padlikam naziralnikaŭ.
Najmieńšaja kolkaść prahałasavaŭšych za piać dzion daterminovaha hałasavańnia była zafiksavana na vybarčym učastku №147 Kastryčnickaha rajona Mahilova. Tam prahałasavaŭ usiaho 158 čałaviek, albo 10,5% ad ahulnaj kolkaści vybarščykaŭ. Aficyjnaja jaŭka supadaje z padlikam naziralnikaŭ.
Naziralnikami kampanii «Prava vybaru-2015» fiksavalisia manipulacyi sa śpisami vybarščykaŭ u bok ich skaračeńnia. Naprykład, na vybarčym učastku №122 Kastryčnickaha rajona Mahilova śpis vybarščykaŭ skaraciŭsia z 4419 da 2232 čałaviek, albo amal na 50,5%. Na učastku №105 Kastryčnickaha rajona Mahilova śpis vybarščykaŭ skaraciŭsia z 2902 da 2090 čałaviek, albo na 28%. Na ŭčastku №4 u Smalavičach, Minskaja vobłaść, śpis vybarščykaŭ skaraciŭsia z 1927 da 1227, albo na 36%.
Ahulnyja vysnovy nazirańnia za daterminovym hałasavańniem padvodzić adzin z kaardynataraŭ kampanii «Prava vybaru-2015» Aleś Siłkoŭ:
- Pa vynikach nazirańnia za daterminovym hałasavańniem na praciahu piaci dzion našy naziralniki vyjavili, što na bolšaści vybarčych učastkaŭ členy kamisij nie prytrymlivalisia ŭ poŭnaj miery normaŭ vybarčaha zakanadaŭstva Respubliki Biełaruś, a na niekatorych vybarčych učastkach vyniki hałasavańnia, možna asprečvać užo zaraz, pa pryčynie značnaha zavyšeńnia jaŭki z boku ŭčastkovych vybarčych kamisij. Takija razychodžańni ŭpłyvajuć na ahulnuju acenku vynikaŭ vybaraŭ i śviedčać pra sprobu padciahnuć jaŭku na vybarach.
Druhi kaardynatar kampanii nazirańnia Dzianis Sadoŭski ličyć, što vybary adbyvajucca pa scenary papiarednich vybarčych kampanij:
- Kampanija nazirańnia «Prava vybaru-2015» kanstatuje surjoznyja parušeńni padčas praviadzieńnia daterminovaha hałasavańnia, jakija dajuć padstavy ličyć daterminovaje hałasavańnie nieprazrystym i niedemakratyčnym sa šmatlikimi faktami pieraškodaŭ u pracy naziralnikaŭ. Jaŭka zaŭvažna nižejšaja na tych vybarčych učastkach, dzie nazirajuć za vybarami našyja naziralniki i tamu ličba ahučanaja Centrvybarkamam u 36% vyhladaje jaŭna zavyšanaj.
U kampaniju pa nazirańni za vybarami «Prava vybaru-2015» uvachodziać vosiem arhanizacyj: Biełaruskaja sacyjał-demakratyčnaja partyja (Hramada), Biełaruskaja Chryścijanskaja Demakratyja, «Havary praŭdu!», «Ruch «Za Svabodu!», Partyja BNF, Biełaruskaja partyja «Zialonyja», niezaležny prafsajuz Radyjoelektronnaj pramysłovaści, arhkamitet Partyi Svabody i prahresa.
Hałoŭnaj metaj kampanii źjaŭlajecca abarona sapraŭdnaha volevyjaŭleńnia hramadzianaŭ praz praduchileńnie parušeńniaŭ zakanadaŭstva na ŭsich stadyjach vybarčaj kampanii, fiksacyju parušeńniaŭ i apieratyŭnaje reahavańnie na ich.
Kamientary