Aktyvista «Havary praŭdu» sudziać za raspaŭsiud narkotykaŭ i parnahrafii
14 śniežnia ŭ sudzie Partyzanskaha rajona Minska pačaŭsia praces pa abvinavačvańni ŭ niezakonnym abarocie narkotykaŭ, ździejśnienym arhanizavanaj hrupaj. Sankcyja artykuła praduhledžvaje da 15 hadoŭ pazbaŭleńnia voli. Siarod piaciarych fihurantaŭ spravy — aktyvist «Havary praŭdu» Ihar Michnaviec. Jon nazyvaje abvinavačvańnie samadurstvam i kaža, što hatovy heta dakazać.
Pavodle abvinavačańnia, usie piać padsudnych datyčnyja da raspaŭsiudžvańnia, a niekatoryja i da vyrabu narkotykaŭ i psichatropaŭ. Kolkaść zakładak, jak pakazana ŭ materyjałach spravy, pieravyšaje sotni.
Za miesiac «minior» moh zarabić kala 40 młn rubloŭ
Adzin ź fihurantaŭ, minčuk Maksim Tałmačoŭ, zaklučyŭ dasudovaje pahadnieńnie. Na pracesie jon padrabiazna začytaŭ, jak zarablaŭ hrošy na narkotykach. Treba skazać, što jaho havorka nahadvała chutčej čyrvonadypłomnika jurfaka BDU, čym vypusknika kaledža Biełkaapsajuza.
Uviesnu 2014 hoda małady čałaviek straciŭ pracu — restaran «Žuravinka», dzie jon pracavaŭ aficyjantam, zakryli. Znajści lehalnuju pracu, pa jaho słovach, za niekalki miesiacaŭ jon tak i nie zmoh. Na sajcie, dzie rekłamujucca kramy pa raspaŭsiudžvańni psichatropaŭ, jaho zacikaviła vakansija «miniora» u «Al Capone shop». Chłopca zadavolili ŭmovy i zarobak — za adnu zakładku abiacali płacić pa 50 tysiač rubloŭ.
Doŭha nad prapanovaj Tałmačoŭ nie dumaŭ, i 15 vieraśnia 2014 hoda atrymaŭ pieršuju partyju kurylnych sumiesiaŭ. Jaho debiut pracadaŭcy acanili ŭ 2,5 młn rubloŭ. U siarednim za dzień Maksim paśpiavaŭ schavać u schovankach pa 30-40 pakietaŭ. Štomiesiačny dachod pry takim raskładzie pavinien byŭ pieravysić 40 młn rubloŭ.
«Apieratar Al Capone majoj pracaj byŭ zadavoleny — zakładki, jakija ja pakidaŭ, praktyčna nie źnikali. Taksama ja dobra apisvaŭ miesca tajnika, klijent biez prablem moh jaho znajści, — raspavioŭ u sudzie Maksim Tałmačoŭ. — Akramia taho, sam ja da narkotykaŭ byŭ abyjakavy. Pieryjadyčna sprabavaŭ kurylnyja sumiesi, kab nie patravić ludziej. Časam niuchaŭ «Chutkaść», kab uzbadziorycca, ale ŭvieś čas ja nie ŭžyvaŭ».
U kastryčniku 2014 hoda jamu davieryli nie tolki raskładvać kurylnyja sumiesi i psichatrop «Chutkaść», ale i zajmacca vyrabam. Padrabiazny recept jamu adpraviŭ Al Capone. Asobu hetaha čałavieka śledstva, darečy, nie vyśvietliła. Viadoma tolki, što jon znachodzicca za miažoj. Jon ža apłačvaŭ pracu Tałmačova — spačatku pakidaŭ hrošy ŭ schovankach, potym pieraličvaŭ na bankaŭskuju kartku, realnym uładalnikam jakoj byŭ rasiejec, jaki dobraachvotna pradaŭ jaje ludziam Al Capone.
Tałmačoŭ pavinien byŭ pieradavać hatovy pradukt inšym «minioram» praz schovanki. Imiony «kalehaŭ» padsudny nie viedaŭ — usio pracavali ananimna. Adnak adno imia ŭ sudzie jon usio-tki nazvaŭ: «Ihar ź nikam svoboden-2013». Pa materyjałach spravy, hetaje imia naležała Iharu Michnaŭcu.
«Ja niekalki razoŭ pakidaŭ dla jaho bujnyja partyi kurylnych sumiesiaŭ — pa 200 hramaŭ», — raspavioŭ Tałmačoŭ. Pavodle jaho słoŭ, hetaha abjomu chapała prykładna na 50 doz.
19 listapada 2014 hoda Maksim Tałmačoŭ adpraviŭsia na «pracu» — raskładvać kurylnyja sumiesi pa schovach. Na vulicy Vałhahradskaj da jaho padyšli dva supracoŭniki milicyi, skazali, što šukajuć złačyncu pa prykmietach i paprasili pakazać dakumienty. Tałmačoŭ nie staŭ chavać, što ŭ jaho z saboj narkotyki. Bolš za toje, dobraachvotna paviedamiŭ, što doma psichatropaŭ jašče bolš.
«Ja raskajvajusia. I pahadziŭsia supracoŭničać sa śledstvam, tamu što nie chaču bolš mieć dačynieńnia da raspaŭsiudžvańnia narkotykaŭ, — zajaviŭ jon u sudzie. — Prosta ŭ mianie była maleńkaja dačka, joj patrebnyja byli srodki na lačeńnie. Inšuju pracu ja tady znajści nie zmoh».
Na pytańnie, kolki hrošaj paśpieŭ zarabić Tałmačoŭ za try miesiacy takoj «pracy», jon adkazać nie zmoh. «Al Capone mnie jašče zastaŭsia pavinien, — zajaviŭ padsudny. — Ja kuplaŭ abutak, apłačvaŭ zdymnaje žyllo… Nie mahu skazać, kolki zarabiŭ».
Na momant zatrymańnia ŭ jaho kanfiskavali telefon iPhone 6 i noŭtbuk MacBook Air. U 2014 hodzie košt hetych dvuch hadžetaŭ pieravyšaŭ 2 tysiačy dalaraŭ.
Nikoha asabista ź inšych abvinavačanych pa spravie Maksim Tałmačoŭ nie viedaŭ. Ale svaju vinu pa č. 4 art. 328 KK (niezakonny abarot narkotykaŭ arhanizavanaj hrupaj) jon pryznaŭ całkam.
«U pratakołach niama mnohaha z taho, što ja kazaŭ śledčym»
Uradženiec Łuhanskaj vobłaści Jaŭhien Kryvašapka, jaki taksama źjaŭlajecca fihurantam kryminalnaj spravy, u Biełaruś pryjechaŭ u 2013 hodzie — na zarobki, nielehalna zajmaŭsia budaŭnictvam, rehistracyi nie mieŭ. Uvosień 2014 hoda zastaŭsia biez pracy. Jak i Tałmačoŭ, znajšoŭ abjavu ŭ internecie, što ŭ kramu «Al Capone shop» patrabujecca «minior».
Hetaja praca jamu padychodziła — pieršy raz narkotyki pasprabavaŭ u 19 hadoŭ, da zatrymańnia ŭžyvaŭ «Chutkaść» praktyčna kožny dzień. Zakład ŭ 5 młn rubloŭ, jaki patrabavaŭsia dla pracaŭładkavańnia, Kryvašapka pazyčyŭ u Ihara Saviča, jon taksama prachodzić abvinavačanym pa spravie.
Ź Iharam Michnaŭcom Kryvašapka paznajomiŭsia, kali jany žyli pa susiedstvie ŭ Baraŭlanach. Potym stali razam zdymać kvateru ŭ Kamiennaj horcy. Pra toje, što Jaŭhien vyrašyŭ zarablać na narkotykach, Michnaviec, pa jaho ž słovach, daviedaŭsia ŭ kancy kastryčnika.
«Što ja tady skazaŭ tabie na heta? — spytaŭ jon u Kryvašapki ŭ sudzie. — Ja skazaŭ: «Źjaviacca pytańni — budzieš sam adkazvać».
Z Al Capone Kryvašapka kamunikavaŭ praź miesiendžary. Pakolki ź jaho telefona zajści ŭ internet było niemahčyma, a noŭtbuk jon advioz dačce va Ukrainu, to karystaŭsia technikaj Michnaŭca i jaho ž akaŭntami ŭ sacyjalnych sietkach.
Ukrainiec u asnoŭnym zajmaŭsia rasfasoŭkaj hatovaj kurylnaj sumiesi, ale adzin raz Al Capone paprasiŭ jaho zrabić narkotyk — reahient, śpirt i padrabiaznuju instrukcyju pieradaŭ praz schovanku. Pravieści apieracyju Kryvašapka, jak jon skazaŭ u sudzie, vyrašyŭ u kvatery, jakuju na niekalki dzion źniaŭ dla Michnaŭca — na toj momant pryjacieli ŭžo raźjechalisia.
Padrychtoŭkaj narkotyku Jaŭhien zajmaŭsia na kuchni nočču 23 listapada, kali Ihar Michnaviec i jaho dziaŭčyna ŭžo spali. Na ranicu Kryvašapka paśpieŭ zrabić kala 20 zakładak ŭ rajonie Cny i viarnucca ŭ kvateru Michnaŭca.
Bližej da abiedu Michnaviec adčuŭ siabie drenna, pačaŭ hublać prytomnaść i paŭtarać: «Vy mianie atrucili!»
«Ciapier ja miarkuju, što pary reahienta mahli asieści na pradukty, bo ja rychtavaŭ narkotyk na kuchni, tamu Michnaviec i atruciŭsia, — adznačyŭ Kryvašapka. — Ja sam taksama adčuŭ niedamahańnie».
Supracoŭniki chutkaj dapamohi adrazu vyznačyli, što pryčyna atručvańnia — narkotyki, i zajavili, što buduć vyklikać milicyju. U hety momant Kryvašapka i dziaŭčyna Michnaŭca vyrašyli chutka pakinuć kvateru, pry hetym na kuchni zastavalisia pakiety z kurylnaj sumieśsiu, šali i inšyja pradmiety dla vyrabu narkotyku.
Pakiety z kurylnaj sumieśsiu, jakija Kryvašapka panios z saboj, jon addaŭ pryjacielu Iharu Saviču, jakomu pa-raniejšamu pavinien byŭ 5 młn rubloŭ. Toj kurylnyja sumiesi pryniaŭ i lišnich pytańniaŭ nie zadavaŭ, choć da hetaha pra «rabocu» Kryvašapki ničoha nie viedaŭ. Zabiahajučy napierad adznačym, što Savič svaju vinu pa č. 4 art. 328 KK całkam nie pryznaje.
Uviečary 26 listapada 2014 hoda Jaŭhien Kryvašapka byŭ zatrymany. I jaho pieršyja pakazańni mocna adroźnivajucca ad taho, što jon skazaŭ u sudzie.
Mienavita Michnaŭca jon nazyvaŭ adzinym pastaŭščykom narkotyku. Śćviardžaŭ, što 23 listapada rabiŭ kurylnuju sumieś razam ź im, Savičam i Illoj Haharynym, heta piaty abvinavačany pa spravie. Infarmacyju z adrasami zakładak pakidaŭ ŭ natatniku Michnaŭca, pra što toj paźniej paviedamlaŭ Al Capone.
Na pytańnie, čamu jaho pakazańni tak istotna adroźnivajucca, Jaŭhien Kryvašapka rastłumačyŭ: «Ja pytaŭsia ŭ śledčaha, čamu ŭ pratakole niama mnohaha z taho, što ja kazaŭ. Jon na heta uśmichnuŭsia i adkazaŭ: «My lepš za vas viedajem, što ŭnosić u pratakoł». Mianie padviali, možna skazać, da takich śviedčańniaŭ. Skazali, vali usio na Michnaŭca, tady budzie č. 1 art. 328 KK, vyjdzieš pad padpisku. Heta ŭžo potym mnie advakat skazaŭ, što tut č. 3, a nie č. 1, tamu nichto mianie nie adpuścić. Z nahody Saviča toje ž samaje. Atrymlivajecca, i jaho abhavaryŭ. Praŭdzivyja pakazańni ja daŭ ciapier u sudzie».
Jon pryznaje, što zajmaŭsia vyrabam i raspaŭsiudam narkotykaŭ, ale admaŭlaje datyčnaść da złačynnaj hrupy.
«Kali b tut byŭ Al Capone i jaho apieratary, inšaja sprava. Ale my nijakaj arhanizavanaj hrupaj nie źjaŭlajemsia», — zajaviŭ abvinavačany na sudzie.
Michnaviec: praviedziena 66 ekśpiertyz, i ni adna nie paćviardžaje maju vinavataść pa narkotykach
Abvinavačany Ihar Michnaviec, čyjo imia čaściej za ŭsio hučyć u sudzie, jašče ŭ pačatku pracesu paprasiŭ pryciahnuć u jakaści śviedki namieśnika hałoŭnaha redaktara haziety «Narodnaja vola» Śviatłanu Kalinkinu. Sud chadajnictva adchiliŭ. Ale my pacikavilisia, što Śviatłanie viadoma pra padsudnaha.
«Ihara Michnaŭca ja viedaju zavočna pa listach u redakcyju, kali były palitviazień Mikałaj Aŭtuchovič adbyvaŭ pakarańnie ŭ Ivacevickaj kałonii. Michnaviec tady paviedamlaŭ žurnalistam pra ŭmovy ŭtrymańnia ŭ PK. Potym kantakty pierapynilisia, — kaža Kalinkina. — Što tyčycca kryminalnaj spravy pa narkotykach, mianie vyklikali z hetaj nahody ŭ Śledčy kamitet. Michnaviec pisaŭ mnie ŭ Fejsbuku, što hatovy dać niejkuju infarmacyju ab supraćpraŭnych dziejańniach pravaachoŭnikaŭ, jakija zaachvočvajuć hety biznes. Ale ja tady heta paviedamleńnie prapuściła. Bolš jon mnie nie pisaŭ i ŭspomniŭ pra heta paviedamleńni tolki tady, kali jon apynuŭsia pad vartaj. Ščyra kažučy, mnie zdajecca, što jon takim čynam prosta choča pryciahnuć uvahu da svajoj spravy».
Mikałaj Aŭtuchovič dobra pamiataje Michnaŭca pa kałonii № 5 u Ivacevičach.
«Heta vielmi aktyŭny čałaviek, jaki ŭvieś čas zmahajecca za spraviadlivaść, — kaža jon. — U kałonii ŭ jaho byŭ asablivy status — «vałacuha», heta značyć, ź jaho mierkavańniem zeki ličylisia. Pry hetym jon pryncypova nie supracoŭničaŭ z administracyjaj i padtrymlivaŭ tych, chto zmahaŭsia za svaje pravy. Jon pieradavaŭ infarmacyju na volu, u tym liku i žurnalistam, ab tym, što realna adbyvałasia ŭ PK. Ci moh jon być datyčny da narkotykaŭ? Nie biarusia sudzić. My nie byli blizkimi siabrami. Ale naohuł Ihar vielmi aściarožny čałaviek».
Pra minułaje Michnaŭca viadoma, što jon čatyry razy byŭ sudzimy: u 1995 hodzie — za kradziež i naŭmysnaje źniščeńnie majomaści, u 1997-m — za vymahalnictva majomaści, u 2000-m — za razboj plus znoŭ vymahalnictva, u 2010-m — za machlarstva. Sam pryznaje tolki pieršyja dva prysudy.
Na pytańnie sudździ, ci pracavaŭ jon aficyjna da ŭziaćcia pad vartu ŭ 2014 hodzie, zajaviŭ: «Tak, u kampanii «Havary praŭdu». — Kim? — Hramadskim dziejačam».
Staršynia «Havary praŭdu» Andrej Dźmitryjeŭ raspavioŭ, što Michnaviec byŭ šarahovym aktyvistam: «Nie mahu skazać, što ŭ mianie asabista było ź im šmat spraŭ».
Na abvinavačvańnie z nahody raspaŭsiudžvańnia narkotykaŭ Ihar Michnaviec zajaviŭ, što heta samavolstva: «I ja pa punktach hatovy heta dakazać». Jon budzie dapytany ŭ sudzie ŭ bližejšyja dni.
«Vysoki sud, ja prašu zanieści maju repliku. Kali b ja pieradavaŭ narkotyki Kryvašapku, 66 ekśpiertyz, jakija pravodzilisia pa spravie, pakazali b moj hienatyp. Ale jaho vyjaŭlena nie było», — adznačyŭ Michnaviec.
Akramia raspaŭsiudžvańnia narkotykaŭ, jaho taksama abvinavačvajuć u raspaŭsiudzie parnahrafičnych materyjałaŭ (č. 2 art. 343 KK, pazbaŭleńnie voli ad 2 da 4 hadoŭ). Pa hetym epizodzie jon častkova pryznaje svaju vinu. Darečy, «UKantakcie» na staroncy ź jaho imiem dahetul raźmieščana niekalki parnahrafičnych rolikaŭ.
Sudovaje raźbiralnictva praciahniecca. Napieradzie — dopyt abvinavačanych, śviedak, ekśpiertaŭ i vyvučeńnie piśmovych materyjałaŭ spravy.
Ciapier čytajuć
Pamierła Śviatłana Kurs. U jaje tvorach spałučalisia mahija žyvoha žyćcia i biaźlitasny psichałahizm. A ŭ publičnych vystupach i FB — rezki antyimpieryjalizm i elehantny liryzm11
Pamierła Śviatłana Kurs. U jaje tvorach spałučalisia mahija žyvoha žyćcia i biaźlitasny psichałahizm. A ŭ publičnych vystupach i FB — rezki antyimpieryjalizm i elehantny liryzm
Statkievič ab pratestach va Ukrainie: Kali vy abrali z takoj pieravahaj prezidenta i adnačasova Viarchoŭnaha hałoŭnakamandujučaha, to dajcie jamu kiravać2626
Kamientary