Basmanny sud Maskvy pryznaŭ niesapraŭdnymi fakty ź niamieckaha filma pra dopinh u rasijskim sporcie, jaki vyjšaŭ u efir telekanała ARD ŭ 2014 hodzie.
Sud spahnaŭ pa try tysiačy rubloŭ z telekanała ARD, režysiora Chansa-Jaachima Zepielta i pary Vitala i Julii Ściapanavych, pakazańni jakich lahli ŭ asnovu filma. U toj ža čas abviaržeńnia vykładzienych faktaŭ sud patrabavać nie staŭ.
Pazoŭ byŭ padadzieny Usierasijskaj fiederacyjaj lohkaj atletyki. Pradstaŭniki istca śćviardžali, što film vyklikaŭ šyroki mižnarodny rezanans, na fonie jakoha rasijskich lohkaatletaŭ amal hod praz adchilili ad mižnarodnych spabornictvaŭ.
Pradstaŭniki adkazčyka nastojvali, što vykładzienyja ŭ filmie fakty nijak nie źnievažajuć fiederacyju, pakolki jana ŭ im naohuł nie zhadvajecca, a havorka ŭ dakumientalnaj stužcy idzie tolki pra kankretnych spartoŭcaŭ i funkcyjanieraŭ.
Sud staŭ na bok zajaŭnikaŭ i pryznaŭ niesapraŭdnymi asobnyja vykazvańni pra ŭstrojstva rasijskaj antydopinhavaj sistemy i karupcyi ŭ joj. Patrabavać abviaržeńnia sud nie staŭ z-za taho, što ŭ kanała ARD niama pradstaŭnictva ŭ Rasii.
Dakumientalny film ARD ab dopinhu ŭ rasijskim sporcie vyjšaŭ u śniežni 2014 hoda. U jaho asnovu lahli słovy eks-supracoŭnika rasijskaha antydopinhavaha ahienctva RUSADA Vitala Ściapanava i jaho žonki, biahuchi Julii Ściapanavaj.
Suśvietnaje antydopinhavaje ahienctva (WADA) stvaryła dla pravierki vykładzienaj u filmie infarmacyi śpiecyjalnuju kamisiju. U listapadzie hetaha hoda kamisija apublikavała dakład, u jakim abvinavaciła rasiejskich lohkaatletaŭ u sistematyčnym ŭžyvańni dopinhu.
U vyniku rasijskich spartsmienaŭ adchilili ad mižnarodnych spabornictvaŭ pa lohkaj atletycy. Paśla hetaha RUSADA rasfarmiravali, kiraŭnik Rasijskaj antydopinhavaj łabaratoryi Ryhor Rodčankaŭ padaŭ u adstaŭku, a łabaratoryja straciła akredytacyju.
«Maje śpinahryzy sa mnoj». Cichanoŭskaja raskazała, što ŭžo vybiraje dla dziaciej škołu ŭ Varšavie12
Kamientary