Prezident ZŠA Barak Abama padčas televizijnych debataŭ raskrytykavaŭ Nacyjanalnuju strałkovuju asacyjacyju ZŠA (NSA) — adno z samych upłyvovych zbrojevych łobi krainy.
Abama zajaviŭ, što «kanśpirałohija», jakuju raspaŭsiudžvaje NSA, pieraškadžaje ŭładam zmahacca z rostam hvałtu, vyklikanym vykarystańniem zbroi. Asacyjacyja, pa słovach Abamy, abvinavačvaje fiederalny ŭrad i jaho samoha ŭ tym, što jany nibyta chočuć kanfiskavać usiu zbroju, što daść mahčymaść uvieści vajennaje stanovišča ŭ krainie.
Abama rastłumačyŭ, što padtrymlivaje kanstytucyjnaje prava na vałodańnie zbrojaj, adnak jaho raspaŭsiudžvańnie pavinna być abmiežavana, kab strymać rost hvałtu ŭ krainie. Jon pryvioŭ u prykład ramiani biaśpieki ŭ aŭtamabilach abo leki z abaronaj ad dziaciej - heta tolki sproby zrabić dazvolenyja pradukty bolš biaśpiečnymi.
Pa słovach Abamy, členy NSA nie chočuć iści ź im na dyjałoh, choć jon nieadnarazova jaho prapanoŭvaŭ.
Debaty, arhanizavanyja telekanałam Si-en-en, prajšli va Univiersitecie Džordža Mejsana ŭ Virhinii. Nacyjanalnaja strałkovaja asacyjacyju u debatach nie ŭdzielničała. Jaje pradstaŭniki zajavili, što ŭ padobnych sprečkach niama sensu, i nazvali debaty pijar-akcyjaj Biełaha doma.
Barak Abama damahajecca ŭvieści zakanadaŭčyja abmiežavańni na prodaž zbroi ŭ ZŠA na praciahu amal usich dvuch svaich terminaŭ na pasadzie prezidenta. Naprykład, jon prapanoŭvaje ŭzmacnić pravierki asoby pierad vydačaj čałavieku licenzii na nabyćcio zbroi. Hetyja miery nie padtrymlivaje kanhres, suprać ich vystupaje Respublikanskaja partyja, mnohija prychilniki jakoj — asabliva žychary paŭdniovych štataŭ, — tradycyjna adstojvajuć prava na vałodańnie zbrojaj.
Na hetym tydni Abama prapanavaŭ novy płan, jaki praduhledžvaŭ uzmacnieńnie patrabavańniaŭ i pravierak handlaroŭ zbrojaj. Hetaje pytańnie nie patrabuje hałasavańnia ŭ kanhresie.
Pytańnie pra abmiežavańni na prodaž zbroi stanovicca adnym z klučavych u vybarčaj kampanii ŭ ZŠA. Demakraty padtrymlivajuć pazicyju Abamy, a respublikancy vystupajuć suprać.
Donald Tramp, adzin z hałoŭnych pretendentaŭ na vyłučeńnie kandydatam ad Respublikanskaj partyi, u dzień vystupu Abamy paabiacaŭ admianić u škołach zony, svabodnyja ad zbroi, kali jon stanie prezidentam.
Ciapier čytajuć
Pačobut parazvažaŭ, ad čaho zaležyć budučynia Biełarusi8
Kamientary