Bił Hiejts padtrymlivaje zapyt FBR ab uzłomie iPhone adnaho z udzielnikaŭ teraktu ŭ Kalifornii. Zasnavalnik Microsoft padkreśliŭ, što heta nie stvoryć precedent ab dostupie da asabistaj infarmacyi.
AP
«Heta kankretny vypadak, kali ŭrad prosić ab dostupie da infarmacyi. Jany nie prosiać pra niejkuju ahulnuju reč, jany kažuć pra kankretny vypadak», — skazaŭ Hiejts u intervju Financial Times.
Zapyt pra ŭzłom pryłady Apple ničym nie adroźnivajecca ad, naprykład, zapytu pra infarmacyju ad telefonnaj kampanii abo banka, ličyć Hiejts: «Davajcie ŭjavim, što bank zakleiŭ dyskavod i skazaŭ: «Nie prymušajcie mianie adklejvać stužku, bo tady vy prymusicie mianie rabić heta šmat razoŭ».
Pazicyja Hiejtsa idzie nasupierak z punktam hledžańnia inšych vysokatechnałahičnych kampanij, padkreślivaje FT. Tak, na bok Apple raniej užo ŭstali Facebook, Twitter, WhatsApp i Google.
Rašeńnie ab tym, što Apple pavinna dapamahčy FBR uzłamać telefon Sajeda Faruka, jaki ŭdzielničaŭ u terakcie ŭ kalifarnijskim San-Biernardyna, pryniaŭ akruhovy sud Łos-Andželesa. U adkaz kiraŭnik Apple Cim Kuk skazaŭ, što zapyt pahražaje biaśpiecy klijentaŭ, a jaho nastupstvy «znachodziacca daloka za ramkami pravavoha pola». Kampanija admoviłasia vykonvać rašeńnie suda i vyrašyła padać na jaho apielacyju.
«Urad paprasiŭ Apple ŭzłamać našych ułasnych karystalnikaŭ i padarvać dziesiacihodździ pracy nad sistemaj abarony klijentaŭ, u tym liku amierykanskich hramadzian, ad vynachodlivych chakieraŭ i kibierzłačyncaŭ», — zajaviŭ Kuk.
Apple taksama zaklikała stvaryć uradavuju kamisiju abo ekśpiertnuju hrupu, jakaja razhledzieła b pytańnie ŭpłyvu sprečki z FBR na nacyjanalnuju biaśpieku i asabistyja svabody.
Ataka ŭ San-Biernardyna adbyłasia 2 śniežnia, paśla jaje pryznali teraktam. Sajed Ryzvan Faruk i jaho žonka Tašfin Malik adkryli ahoń u centry dla ludziej z abmiežavanymi mahčymaściami, u vyniku stralaniny zahinuli 14 čałaviek, 22 paranienyja.
Kamientary