Biełarus Parfiankoŭ aryštavany ŭ Kijevie za ŭdzieł u razhromie ofisa rasijskaha banka

U internecie źjaviłasia videa, na jakim zafiksavana, jak biełarus Vasil Parfiankoŭ udzielničaje ŭ razhromie adździaleńnia «Alfa-banka» ŭ Kijevie.

Parfiankoŭ pierajechaŭ va Ukrainu i ŭstupiŭ tam u Dobraachvotnicki korpus AUN («Arhanizacyja ŭkrainskich nacyjanalistaŭ»). Niadaŭna jon atrymaŭ dazvoł na žycharstva va Ukrainie.

Pavialičyć

Jaho kamandzir Mikoła Kachanoŭski skazaŭ radyjo «Svaboda»: «Vasil nie zrabiŭ nijakaha razboju, jon dziejničaŭ pavodle ŭkazańnia svajho kamandzira, heta značyć mianie. Ja ŭziaŭ na siabie adkaznaść za hetuju akcyju».

Hrupoŭka AUN publična abviaściła ŭ Kijevie «akcyju pa źniščeńni rasijskaha biznesu».

Na minułych vychadnych bajcy atrada «pabili» ofis Rynata Achmietava, razhramili ofis rasijskaha «Alfa-banka» i pabili vitryny ŭ ofisie «Śbierbanka Rośsii».

Prezident Ukrainy Piatro Parašenka nazvaŭ napady na ofisy pravakacyjaj.

Rasijskija ŚMI zrabili hetyja zdareńni hałoŭnaj temaj svaich vypuskaŭ na hetych vychadnych.

Vasil Parfiankoŭ — pieršy, kaho zatrymali ŭ suviazi z pahromami.

Ciapier Parfiankoŭ znachodzicca ŭ izalatary časovaha ŭtrymańnia ŭ Kijevie. Papiarednie jaho abvinavačvajuć pa artykule 296 č.2 kryminalnaha kodeksu Ukrainy «Chulihanstva». Pavodle hetaha artykułu, Parfiankovu moža pahražać da čatyroch hadoŭ źniavoleńnia.

Bataljon AUN vystupiŭ z zajavaj, što ličyć spravu palityčna matyvavanaj i zaklikaje da nieadkładnaha vyzvaleńnia Parfiankova. U bataljonie kažuć, što akcyja nakiravanaja «na źniščeńnie rasijskaha biznesu, suprać ustanovaŭ, što zarablajuć hrošy na kryvi ŭkraincaŭ».

«Takim sposabam my abviaścili pratest suprać hetych ustanoŭ, jakija zarablajuć hrošy na kryvi ŭkraincaŭ. Atrymlivajecca, što my vajujem z Rasijaj, a Rasija ŭ nas tut zarablaje hrošy», — kaža Kachanoŭski.

Zaŭtra ŭ Šaŭčenkaŭskim sudzie Kijevie maje adbycca sud, jaki vyznačyć mieru strymańnia Vasilu Parfiankovu.

Bolš za hod Parfiankoŭ znachodzicca va Ukrainie, dzie prymaŭ udzieł u bajavych dziejańniach. Byŭ paranieny ŭ nahu, doŭhi čas lačyŭsia. Mieŭ pazyŭny «Siabra».

U Biełarusi Parfiankoŭ aryštoŭvaŭsia za ŭdzieł u padziejach na Płoščy ŭ 2010-m. Paźniej jaho taksama nakiroŭvali na prymusovaje lačeńnie ad ałkahalizmu.

U internecie raspaŭsiudžvajecca inšy kadr z razhromu. Na im, imavierna, zafiksavany inšy biełarus, što pajechaŭ vajavać va Ukrainu — Eduard Łobaŭ.

Pavialičyć

Jon pakul nie adkazaŭ na zapyt «Našaj Nivy» pra kamientar.

• 0
• 0
• 0
• 0
• 0
• 0
• 0
• 0