Dzi Kaprya dapamoh biełaruskaj mabilnaj prahramie MSQRD uvajści ŭ top-5 App Store
Mabilnaje prykładańnie MSQRD, raspracavanaje biełaruskaj kampanijaj Masquerade Technologies Inc., zaniało treciaje miesca ŭ rejtynhu samych papularnych prykładańniaŭ u amierykanskim App Store napiaredadni ŭručeńnia premii «Oskar», adnym z tryumfataraŭ jakoha staŭ akcior Leanarda Dzi Kaprya, paviedamiła ahienctva Bloomberg sa spasyłkaj na dadzienyja daśledčaj kampanii App Ann.
Paśla taho jak papularny amierykanski televiadučy Džymi Kimeł za niekalki dzion da cyrymonii «Oskar» prademanstravaŭ u svaim šou pracu dadatka, prymieryŭšy masku Dzi Kaprya, MSQRD vyrvaŭsia ŭ lidary siarod mabilnych prykładańniaŭ dla apracoŭki fatahrafij i videa. Pa ŭłasnych dadzienych Masquerade, lik zapampovak prykładańnia nabližajecca da 12 młn pa ŭsim śviecie.
Karystalniki z dapamohaj MSQRD mohuć nakłaści maski z rysami tvaraŭ viadomych ludziej na źniatyja na mabilnyja pryłady videa svajho tvaru i zatym vykłaści atrymany rolik u Instagram abo inšyja sacyjalnyja sietki. Maska, jakaja pakazvaje Leanarda Dzi Kaprya ŭ asiarodździ dvuch statuetak «Oskar», uvachodzić u lik samych papularnych u MSQRD.
Siarhiej Hančar, Jaŭhien Zaciepiakin i Jaŭhien Niaŭhień stvaryli MSQRD padčas 48-hadzinnaha chakatonu ŭ Minsku ŭ listapadzie 2015 hoda. Tady prykładańnie dazvalała dadavać da adlustravańnia tvara tolki vusy.
Da Novaha hoda raspracoŭščyki abnavili prykładańnie, prapanavaŭšy karystalnikam vykarystoŭvać maski viadomych ludziej. Masquerade pryciahnuŭ inviestycyi ŭ pamiery $ 1 młn i płanuje pavialičyć štat raspracoŭščykaŭ, jaki zaraz naličvaje 12 čałaviek.
Kamientary