Na dniach maskvička Iryna ŭ sacsietkach apisała niepryjemnuju situacyju, u jakuju patrapiła jana, muž i ich dzicia na trasie R99 na terytoryi Słonimskaha rajona. Siamja viartałasia na Toyota Prius z Čechii, maskvičy pierasiekli miažu, i nieŭzabavie adno koła ich mašyny łopnuła. Jany stali telefanavać pa numarach apieratyŭnych słužbaŭ, na prośby dapamahčy adhuknulisia na linii «102». Toje, što adbyvałasia dalej, uraziła žančynu. Pryvodzim poŭny tekst pasta Iryny.
«Vyleźli z mašyny i ŭbačyli, što adno z kołaŭ na vobadzie, — piša žančyna. — Muž pakapaŭsia ŭ bahažniku i skazaŭ, što niama kluča, kab pamianiać koła na zapasnoje, i naohuł za bortam strašennaja chaładeča. Telefanuju ŭ słužbu «112». Tam mnie kažuć, što z kołami — heta nie da ich. Telefanuju ŭ «102» (anałah našaj palicyi). Tłumaču, što staju niedaloka ad horada Słonim na trasie i što mnie patrebna techdapamoha abo chacia b evakuatar. Mianie vysłuchali i skazali čakać. Čakajem. Nastroj pahany».
«Za rulom była ja, — udakładniła Iryna ŭ hutarcy z karespandentam Onliner.by. — Maja Toyota Prius zvyčajna nie łamajecca, ale koły — reč niepradkazalnaja. Pryznacca, my čakali śpiecyjalizavanuju dapamohu, rychtavali hrošy. U nas zvyčajna pryjazdžaje pikap, nabity instrumientami. Časam śpiecyjalistu ŭdajecca likvidavać prablemu na miescy, časam jon biare aŭto na buksir. Naturalna, pasłuha hetaja płatnaja. Ja nabrała «102», bo nie viedała, jak datelefanavacca da profilnaj techdapamohi. I ŭžo dakładna nie čakała, što pryjedzie mašyna DAI».
«Praz 10—15 chvilin pobač z nami spyniłasia mašyna DPS, ź jaje vylez małady simpatyčny supracoŭnik. Jon pryjechaŭ nas ratavać! Na pytańnie, jak heta jon tak chutka prymčaŭsia, jon adkazaŭ, što voś jakraz abiedaŭ (!!!), kali pastupiŭ moj vyklik, tamu i zmoh adrazu prybyć. Aktyŭna ŭziaŭsia za spravu. Kluč u jaho mašynie nie padyšoŭ da našych kołaŭ pa pamiery. Tady jon pakapaŭsia ŭ našym bahažniku i vyvudziŭ ź jaho naš ułasny kluč, jaki nie trapiŭsia na vočy mužu. Sprytna adkruciŭ koła, muž dapamahaŭ».
«Na Toyota jezdžu mienavita ja, tamu muž nie viedaŭ, dzie znachodzicca kluč i ci jość jon naohuł, — udakładniła nam Iryna. — Ja nie zdahadvałasia pra jaho isnavańnie. Zvyčajna kluč znachodzicca pobač z dakatkaj, ale ŭ našym vypadku jon lažaŭ asobna, tamu i ŭźnikła takaja błytanina».
«Adnak koła «pryvaryłasia» i zdymacca nie pažadała, — apisvaje žančyna raźvićcio situacyi ŭ paście. — Naš vyratavalnik spytaŭ, ci niama ŭ nas kuvałdy. U nas jaje nie było. Tady palicejski spyniŭ małakavoz, jakija prajazdžaŭ pobač (zrazumieła, što jon spyniŭsia, bo jaho tarmaziŭ supracoŭnik DPS), i paprasiŭ kuvałdu ŭ kiroŭcy. Kiroŭca małakavoza ryśsiu padbieh da nas, trymajučy ŭ ruce vializnuju kuvałdu. Ni siekundy nie zadumvajučysia, dziubnuŭ pa kole, jano pavaliłasia, i małakavozca toj ža žvavaj ryśsiu pabieh nazad u svoj hruzavik.
Zamianić «zahinułaje» koła na našu dakatku było ŭžo prostaj spravaj. My spytali supracoŭnika DPS, ci nie viedaje jon, dzie pablizu možna kupić novaje koła, kab dajechać da Maskvy. Jon tut ža patelefanavaŭ u najbližejšy šynny mahazin, vyśvietliŭ u ich usio pra asartymient i zatym supravadziŭ nas tudy na svajoj mašynie, kab my nie zabłukali. Usia hetaja epapieja zaniała, napeŭna, 30—40 chvilin. Oskar [syn pary z Maskvy — zaŭv. Onliner.by] u mašynie navat nie paśpieŭ zasumavać.
Ja nie viedała, jak dziakavać našamu vyratavalniku, ale jon vietliva skazaŭ, što, moža, jon kali-niebudź pryjedzie ŭ Maskvu i ŭ jaho taksama zdarycca padobnaje. Tut jaho i vyručać… Ja zarahatała, ujaviŭšy sabie, jak jon telefanuje ŭ Rasii na trasie ŭ palicyju i raspaviadaje pra svaje prablemy z kołam. Sumniavajusia, što jon znojdzie takuju padtrymku i chutkuju dapamohu.
Siabry, ja ŭ zachapleńni ad biełaruskaj palicyi. Nie viedaju, jak zaraz adździačyć našamu vyratavalniku. Nie zdahadałasia spytać jaho imia i proźvišča. Dla mianie heta bieznazoŭny supracoŭnik DPS z horada Słonim u Biełarusi. Ale ja padumała, chaj pabolš ludziej daviedajecca pra taki ŭčynak, i, moža być, jaho načalstva ci navat jon sam zmohuć pračytać maju ŭdziačnaść tut».
Va UUS Hrodzienskaj vobłaści vyśvietlili, što «nieviadomym» supracoŭnikam DAI byŭ staršy inśpiektar DPS major milicyi Alaksandr Kalinin.
Kamientary