Karatkievič, Davydźka i Kazijatka abmierkavali ŭ Łondanie svabodu biełaruskich ŚMI
Eks-kandydat u prezidenty, adna ź lidaraŭ kampanii «Havary praŭdu» Taćciana Karatkievič vystupiła na kanfierencyi Rady Jeŭropy ŭ Łondanie. Tema — rola parłamientaŭ u palapšeńni stanovišča ŭ halinie svabody ŚMI. Akramia palityka, ad Biełarusi tudy pajechali kiraŭnik Biełteleradyjokampanii Hienadź Davydźka i hiendyrektar STB Juryj Kazijatka.
— U mianie była mahčymaść raskazać, što ŭ nas jość ciažkaści sa svabodaj miedyja, ich prazrystaściu, a taksama — prezientavać svaju arhanizacyju, — raspaviała TUT.BY Karatkievič. — Nam patrebien šyroki hramadski dyjałoh, jaki bieź miedyja nie arhanizavać.
Karatkievič zajaviła, što pracy niezaležnych ŚMI ŭ Biełarusi pieraškadžajuć «raznastajnyja, čaściej nadumanyja, abmiežavańni z boku ŭłady». Palityk padkreśliła, što mižnarodnaja supolnaść mahła b sadziejničać vyrašeńniu takich daŭno naśpiełych prablem, jak, naprykład, akredytacyja radyjo «Racyja» i telekanała «Biełsat», dopusk ŭ padpisku štotydniovika «Svobodnyje novosti-plus» i pieraśled uładami fryłansieraŭ.
— Publičnych dyskusij z Davydźkam i Kazijatkam u mianie nie było, jany z dakładami nie vystupali. Adzinaje, Davydźka vykazaŭ aficyjnuju pazicyju, jakuju šmat razoŭ užo ahučvała i [ministr infarmacyi Lilija] Ananič, što ŭ nas šmat pryvatnych zarehistravanych miedyja.
Karatkievič ŭdałosia pahutaryć z kiraŭnikami BT i STV u pierapynku.
— Jany pryznali tyja prablemy, jakija prahučali padčas kanfierencyi, u pryvatnaści, što niama razumieńnia i prazrystaści ŭ finansavańni dziaržaŭnych ŚMI. U ich pytańnie ŭźnikła, a chto finansuje niezaležnyja ŚMI.
Palityk taksama spytała kiraŭnikoŭ dziaržaŭnaha TB, jakim budzie aśviatleńnie parłamienckaj kampanii.
— Jany skazali, što ŭ ich usio budzie ŭ ramkach zakanadaŭstva i što telekanały rychtujuć niejkija dyskusijnyja prajekty, mahčyma, buduć pašyrać kolkaść vystupoŭcaŭ.
Akramia kanfierencyi Rady Jeŭropy, Karatkievič praviała sustrečy ŭ MZS, z pradstaŭnikami Lejbarysckaj partyi i biełaruskaj dyjaspary ŭ Łondanie.
Ciapier čytajuć
U turmie pamior były supracoŭnik KDB Mikałaj Varapaj, asudžany za špijanaž na karyść Ukrainy3
Kamientary