Avataraŭ nie pryznaŭ siabie vinavatym u kantrabandzie vybuchovaha prystasavańnia, a taksama pa ŭdakładnienym abvinavačańni
29-hadovy Taras Avataraŭ na słuchańniach u sudzie Frunzienskaha rajona Minska 3 maja nie pryznaŭ siabie vinavatym u kantrabandzie vybuchovaha prystasavańnia (č. 2 art. 228 KK), a taksama pa ŭdakładnienym abvinavačańni. Žychar Navapołacka, jaki pravioŭ niekalki miesiacaŭ va Ukrainie ŭ strukturach «Pravaha siektara», pryznaŭ vinu ŭ niezakonnym abarocie vybuchovaha prystasavańnia (č. 2 art. 295 KK).
Pry hetym Avataraŭ pasprabavaŭ ustupić u palemiku ź dziaržabvinavaŭcam adnosna pravilnaści taho, što kanfiskavany ŭ jaho pradmiet kvalifikujecca jak «vybuchovaja pryłada». Małady čałaviek, apierujučy daviedačnymi źviestkami sa śpiecyjalnaj litaratury i zakanadaŭstva, nastojvaje na tym, što pry zatrymańni ŭ Minsku ŭ jaho była kanfiskavanaja ŭsiaho tolki sihnalnaja zbroja, a nie vybuchovaje prystasavańnie na asnovie askołačnaj hranaty. Avataraŭ kateharyčna nastojvaje na tym, što ŭ vybuchovym prystasavańni majecca uzryvalnik, a ŭ kanfiskavanym u jaho pradmiecie — zapał, tamu havorka moža iści tolki pra sihnalnuju zbroju, abarot jakoj nie zabaronieny.
Varta zaznačyć, što pakazańni Avatarava adnosna vybuchovaha prystasavańnia błytajucca i mianiajucca nie tolki ad adnaho sudovaha pasiadžeńnia da inšaha, ale i padčas samich pasiadžeńniaŭ. Spačatku jon paviedamlaŭ, što znajšoŭ prystasavańnie ŭžo ŭ Minsku, zatym, što jaho padkinuli ŭ mašynu pa darozie z Kijeva ŭ Homiel niejkija supracoŭniki. Potym jon paviedamiŭ, što hranatu daŭ niejki Kulibin, i ź joj Avataraŭ źbiraŭsia na terytoryju Rasii dla viadzieńnia hłybinnaj vyviedki.
Siońnia Avataraŭ naohuł zajaviŭ, što nie moža havaryć u adkrytym sudovym pasiadžeńni, jak u jaho apynuŭsia bojeprypas.
Nahadajem, žychar Navapołacka Taras Avataraŭ (da 2011 hoda — Pośpich) byŭ zatrymany na čyhunačnym vakzale ŭ Minsku ranicaj 26 listapada 2015 hoda. Pry vobšuku ŭ jaho vyjaŭlenyja maska z prarezami dla vačej, dva pašparty, samarobnaje vybuchovaje prystasavańnie na asnovie askołačnaj hranaty, sihnalny pistalet, padobny na PM, elektronnyja nośbity, čorna-čyrvony ściah, a taksama daviedka ab udziele ŭ antyterarystyčnaj apieracyi na terytoryi Ukrainy ad imia «Pravaha siektara». U momant zatrymańnia na padazronym była armiejskaja broniekamizelka.
Kamientary