«Skažy «dziakuj», što nie pasadzili» — Alinu Kasoŭskuju, dobraachvotnuju ŭdzielnicu bajavych dziejańniaŭ va Ŭkrainie zatrymaŭ KDB na vychadzie ź mienskaha padjezdu.
Alina kaža, što pryjechała ŭ Biełaruś u adpačynak. Ludzi sabrali joj hrošy i planšet na dapamohu biełaruskim dobraachvotnikam. Za hetyja hrošy joj daviałosia pad prymusam KDB kupić kvitok na samalot u Kijeŭ.
«Ja bajec ATA, pryjechała ŭ Biełaruś u adpačynak, praviała tam dva tydni, a siońnia mianie zatrymaŭ KDB i adviez u svoj budynak, — raspaviała Alina Radyjo Svaboda, jak tolki jaje samalot pryziamliŭsia ŭ Kijevie. — Padjechaŭ hramadzianski «busik», mianie i jašče dvuch čałaviek, jakija byli sa mnoj, tudy zaciahnuli. Było ich 5 čałaviek. Skazali, što KDB, pryčynu zatrymańnia nie patłumačyli, pryvieźli ŭ pastarunak. Adrazu pačali dapytvać, pieraryli rečy. Paśla skazali za dźvie chviliny sabrać rečy i vyjechać u aeraport. Inakš pasadziać «na dziesiać hod».
Padčas razmovy joj zadavali pytańni nakont biełaruskich dobraachvotnikaŭ va Ŭkrainie, na jakija Alina adkazvać admoviłasia. Taksama KDB cikaviła, dzie jana žyła ŭ Biełarusi i ź kim sustrakałasia.
U supravadžeńni supracoŭnikaŭ KDB Alina vyjechała ŭ aeraport. Pa prylocie ŭ Kijeŭ jana zaŭvažyła, što KDB kanfiskavaŭ usiu biełaruskuju symboliku, jakuju pieradali va Ŭkrainu ź Biełarusi. Pratakoł pra vymańnie rečaŭ nie składaŭsia. A ŭ tym pratakole, jaki Alina padpisała, byli tolki jaje pašpartnyja dadzienyja i pieralik rečaŭ, jakija jana mieła pry sabie. Pryčyna zatrymańnia, kaža Alina, ukazanaja nie była. Štamp u pašparcie pra departacyju ci zabaronu ŭjezdu ŭ Biełaruś joj taksama nie pastavili.
U budynku KDB dziaŭčynu sfatahrafavali i źniali adbitki palcaŭ. Jana raspaviadaje, što ŭ Biełarusi sustrakałasia z pradstaŭnikami patryjatyčnych ruchaŭ, brała interviju dla svajho błohu.
Kasoŭskaja kaža, što zaŭvažała za saboj «chvasty» na praciahu apošnich piaci dzion znachodžańnia ŭ Biełarusi i ŭ roznych haradach.
«Biełaruskaja ŭłada vielmi baicca svaich patryjotaŭ. A tym bolš ukrainskich. Tamu meta była, kab mianie jak minimum departavać ź Biełarusi, kab ja nie była pahrozaj biełaruskaj uładzie, chacia ja nia viedaju, čaho jany tam bajacca», — kamentuje Alina mahčymuju pryčynu zatrymańnia.
Kamientary